DILI, 06 Marsu 2026 (TATOLI)—Portavós Globál United Nations Children’s Fund (UNICEF), James Elder, akompañadu husi Ministra Edukasaun, Dulce de Jesus no Reprezentante Nasaun UNICEF iha Timor-Leste, Patrizia Digiovanni, atualiza progresu servisu ne’ebé sira halo durante ne’e iha Timor-Leste no planu prioridade ba futuru nian ba Primeiru-Ministru, Kay Rala Xanana Gusmão.
Objetivu prezensa iha Timor-Leste ne’e atu haree situasaun iha Timor-Leste la’o de’it hanesan doadór finasiamentu maibé atu hato’o sira-nia apresiasaun servisu entre Governu Timor-Leste ho UNICEF.
Portavós Globál United Nations Children’s Fund (UNICEF), James Elder, hateten nia hasoru malu ho Primeiru-Ministru, Kay Rala Xanana Gusmão, ne’e hanesan oportunidade ida atu koa’lia kona-ba parséria servisu ne’ebé durante ne’e hala’o iha área edukasaun, protesaun labarik, bee-moos no saneamentu no área seluk tan.
“Maibé pontu prinsipál ne’ebé nia ko’alia ho Primeiru-Ministru kona-ba servisu boot ne’ebé ministériu halo liuhusi kooperasaun ho UNICEF. Iha oportunidade ida-ne’e ami konsege la’o hamutuk ho ekipa vasinasaun no ekipa sensibilizasaun importánsia husi nutrisaun iha munisípiu Manufahi liuliu família sira iha área remota,” Reprezentante UNICEF ne’e informa ba jornalista sira iha Palásiu Governu, ohin.
Nia afirma, pesoál saúde sira-ne’e hetan mós apoiu formasaun husi UNICEF ne’ebé bele ajuda kapasita sira halo servisu iha saúde movel nian bainhira ba vizita família hirak ne’ebé iha oan no inan isin-rua sira.
Aleinde ne’e, intervensaun daruak ne’ebé horisehik sira halo diretamente ba vizita komunidade balun iha Hera hodi haree intervensaun enérjia renovavel liuhusi instalasaun solár panél ne’ebé sira instala iha tinan kotuk iha postu saúde Hera, Lautein, Ataúru ho fundu millaun $5 no enérjia eletríka ida-ne’e aleinde fó enérjia ba sentru saúde maibé mós fasilita ba eskola no sede suku.
“Entaun, intervensaun sira ne’e ajuda mantein pesoál iha postu saúde bele servisu ho di’ak no sira bele rai sira-nia vasinasaun ho seguru no estudante sira bele aproveita enérjia ne’e sein dependente ba enérjia eletrisidade husi sentrál,” nia esplika.
Aleinde ne’e, nia hatutan, iha enkontru ne’e mós sira atualiza programa ne’ebé durante ne’e UNICEF halo iha Timor-Leste mak ohin mós marka prezensa husi Ministra Edukasaun tanba área edukasaun mós sai programa prinsipál iha UNICEF bele koopera no mellora programa sir= ne’e ba oin.
Planu prioridade ba futuru sei servisu hamutuk ho Ministériu Edukasaun tanba ME mós husu ba UNICEF bele hola parte iha sistema alerta sedu ME nian atu minimiza risku dezastre naturál ba eskola sira.
“Tanba ne’e Primeiru-Ministru mós aprésia ho servisu hamutuk ne’e no nia hatutan katak UNICEF bele sai parséria no servisu hamutuk di’ak liután ho Timor iha futuru oin mai,” nia dehan.
Jornalista : Alexandra da Costa
Editór : Cancio Ximenes
