BOBONARU, 09 Marsu 2026 (TATOLI) – Udan ho intensidade boot iha semana kotuk rezulta rai-halai hodi kontinua sobu kanál irrigasaun Maliana I ne’ebé empreza internasionál PT. Minarta reabilita ona ho distánsia metru 50.
Natar-na’in iha suku Lahomea, Nazario Fátima Lopes, preukupa no husu atu buka meiu ne’ebé di’ak liu, tanba durante fulan ida ona irrigasaun Maliana I la funsiona.
“Husu ba Governu atu hadi’ak kanu ne’e, se la’e hare iha Maliana ne’e so’e tanba bee agora la mai”, nia dehan iha natar Ramaskora, ohin.
Xefe Suku Ritabou, Maximiano dos Santos Araújo, reforsa katak problema ne’e bele afeta ba produsaun hare tanba natar barak falta bee.
“Irrigasaun ne’e aat besik ona fulan ida. Se ida-ne’e mak kontinua aat klaru katak tinan ida-ne’e ita bele hatete katak gagal panen, tanba natar parte Lahomea, Raifun, Holsa, Odomau no Ritabou uza hotu irrigasaun Maliana I”, katak.
Xefe suku ne’e argumenta katak atu rezolve problema rai halai ne’e tenke liuhusi dalan kultura, tanba danu ne’e kauza husi natureza.
Aleinde ne’e, Xefe suku Lahoema, Cirílio Mau Leto, sei husu apoia husi parte kompetente, liuliu Diresaun Servisu Munisipál Agrikultura hodi realiza serimonia kulturál, nune’e bele suku fila-fali rai.
“Ami suku ne’e laiha osan, ne’e mak ohin dadeer ha’u bolu ona lia-na’in rua mai, karik parte agrikultura fó netik fundu mai ita halo netik kultura. Se la’e ha’u orienta ona xefe aldeia ho lia-na’in sira ho natar-na’in halo kontribuisaun ba saida mak ita atu halo”, dehan.
Xefe suku ne’e rekomenda ba Ministériu Agrikultura, Pekuária, Peska no Floresta atu tau orsamentu ba manutensaun regulár ba irrigasaun Maliana I hodi responde ba situasaun emerjénsia.
Tatoli tenta halo konfirmasaun ho Diretór Servisu Munisipál Agrikultura, Pekuária, Peska, no Floresta, Longuinhos João, kona-ba asuntu ne’e maibé la fó komentáriu tanba okupadu ho serbisu.
Tuir informasaun husi Guarda Irrigasaun Maliana I, iha loron 08 Marsu ne’e tékniku PT. Minarta kontinua halo levantamentu dadus no planu atu uza faliManila hanesan meiu emerjénsia ida atu fornese bee ba natar, nune’e agrikultór sira bele aproveita faze kultivu.
Irrigasaun Maliana I reabilita husi parseiru Internasionál JICA entre tinan 2008-2009 no obra ne’e hanesan ajuda husi povu Japaun nudar sinál amizade no kooperasaun entre Japaun no Timor-Leste.
Tuir dadus ne’ebé Tatoli asesu, irrigasaun ne’e sei fornese bee ba natar hamutuk ektare 1.050, partense ba suku Lahomea, Raifun, Odomau no Ritabou.
Notísia relevante: PT. Minarta hahú normaliza kanál irrigasaun Maliana I
Jornalista: Sergio da Cruz
Editora: Maria Auxiliadora
