DILI, 10 Marsu 2025 (TATOLI )—Polísia Nasionál Timor-Leste (PNTL) liuhusi Eskuadra Kristu Rei identifika ona suspeita ho inisiál JRO, ne’ebé abandona bebe feto ho kondisaun Hidrosefalus, durante semana tolu iha Hospital Nacional Guido Valadares (HNGV).
Iha Segunda (09/03/2026) tuku 11:00, Komandante Eskuadra Kristu Rei, Inspetór Xefe Polísia Paulino de Carvalho, hetan telefone husi seguransa no ofisiál atendimentu ba labarik iha HNGV, tanba ne’e nia to’o iha ospitál hodi konfirma kondisaun ne’e ikus mai identifika duni iha bebe abandonadu.
Polísia buka informasaun relevante relasiona paradeiru JRO ne’ebé bá partu iha HNGV. Iha Tersa (10/04) dadeer, família sira mós hatene ona alin-feto ne’ebé partu bebe iha ospitál, nune’e nia bin na’in-rua presta ona deklarasaun iha Eskudra Kristu Rei.
Notísia relevante : Aban, médiku sei halo CT-Scan ba bebé feto “Hidrosefalus” nia ulun
Komandante Eskuadra Kristu Rei, Inspetór Xefe Polísia Paulino de Carvalho, hateten, hafoin simu informasaun, nia parte kanaliza kedas ba parte investigasaun iha parte Vulnerable Person Unit (VPU) Munisípiu Díli atu haree kontinuasaun ba prosesu ne’e la’o oinsá.
“Daudaun ne’e ekipa saúde, madre sira, no funsionáriu HNGV mak trata hela bebé ne’e to’o agora kondisaun di’ak hela,” Inspetór Xefe Polísia Paulino de Carvalho hateten ba Jornalista sira iha ninia knaar fatin, Bekora, Tersa ne’e.
Nia haktuir, Polísia bolu ona bebe nia nia inan no tia sira hodi presta deklarasaun.
“Polísia Nasionál Timor-Leste Eskuadra Kristu Rei fó prazu tempu oras 24 nia laran ba suspeita JRO atu integra-an,” nia informa.
Jornalista : Natalino Costa
Editora : Julia Chatarina
