DILI, 12 Marsu 2026 (TATOLI)—Ministru Ensinu Superiór, Siénsia no Kultura (MESSK), José Honório Pereira da Costa Jerónimo relata MESSK presiza lista jornalista na’in-sanulu (10) ne’ebé atu asesu ba Universidade Naionál Timor Lorosa’e (UNTL), maibé pagamentu ne’e hosi Fundu Dezenvolvimentu Kapitál Umanu (FDCH-sigla portugeza).
Nia hatutan, propina maihusi FDCH, nune’e deklarasaun husi SEKOMS la sala, maibé liafuan balun mak laloos, tanba ministériu la fó bolsa estudu.
“Bolsa tenke atribui husi FDCH, maibé ami presiza lista husi SEKOMS atu ami bele diskute iha Konsellu Adminstrasaun FDCH, atubele selu bolseiru jornalista na’in-sanulu (10) nia propina,” Ministru José dehan.
Ministru dehan daudaun ne’e ministériu seidauk simu lista bolseiru jornalista hirak-ne’e nian husi SEKOMS, maski sira liuhusi rejime espesiál maibé sira tuir teste mak liu.
“Maibé, ha’u hatete ba sira, karik sira seidauk hetan orsamentu husi FDCH, entaun sira tenke selu lai, tanba ami presiza karta maihusi SEKOMS para ami bele diskute iha Konsellu Jerál FDCH nian. Ha’u hanoin saida mak SEKOMS ko’alia la sala ida, loos hela. Agora ministériu la fó bolsa ba sira maibé sira liu iha departamentu komunikasaun sosiál, depoiz sira bele hato’o pedidu ba FDCH, depoiz ami bele diskute iha konsellu adminstrasaun hodibele atribui orsamentu uitoan ba sira atubele selu sira-nia propina,” nia esplika.
Iha fatin seluk, Diretór Ezekutivu Fundu Dezenvolvimentu Kapitál Umanu, Júlio Aparício informa kona-ba bolsa ba estudante komunikasaun sosiál ne’e kompeténsia Sekretaria Estadu Komunikasaun Sosiál (SEKOMS).
“Ami hein de’it Sekretaria Estadu Komunikasaun Sosiál manda pedidu proposta, ne’ebé iha lista estudante atu asesu ba bolsa estudu. Ami hein halo pagamentu de’it. Lista estudante, bá foti área saida no nivel estudu sira-ne’e SEKOMS mak hatene,” nia informa.
Antes ne’e, Sekretáriu Estadu Komunikasaun Sosiál, Expedito Loro Dias Ximenes, husu jornalista na’in-sanulu ne’ebé naran tama ona iha Universidade Nasionál Timor Lorosa’e (UNTL) ba tuir lai aula, depoiz MESSK mak sei haree oinsá sira-nia propina.
Expedito tenik depoiz konsulta Ministru Ensinu Superiór, Siénsia no Kultura, kolega jornalista na’in-sanulu ne’ebé lista haruka mai SEKOMS, sira-ne’e haruka tiha ona bá iha UNTL.
“Sira bele hahú tama ona eskola iha UNTL, maibé sira-nia propina ne’e, hanesan UNTL Estadu nian sira bele tama lai depoiz MESSK mak sei bele haree filafali sira nia propina. La’ós sira bá selu kedas, la’e, purtantu MESSK sei ko’alia ho Reitór UNTL katak jornalista sira-ne’e sei bá tuir aula lai depoiz mak ministériu mak haree sira-nia propina,” Loro Dias subliña.
Nune’e, Expedito esplika, la’ós SEKOMS mak selu propina jornalista na’in-sanulu nian, tanba ne’e relasaun ho jornalista ho média entaun MESSK husu mai iha SEKOMS, no SEKOMS prepara de’it jornalista sira ne’ebé señior.
Nia reforsa, tanba iha kritériu, jornalista ne’ebé atu tuir eskola ida-ne’e tenke mínimu servisu iha mídia ne’e tinan lima, nia tama katégoria señior, ida-ne’e mak kritériu ne’ebé SEKOMS fó fali.
Jornalista: Osória Marques
Editór: Xisto Freitas da Piedade
