DILI, 23 Marsu 2026 (TATOLI)—Prezidente Bee Timor-Leste, Empreza Públika (BTL, E.P), Gustavo da Cruz, hateten sira kontinua esforsu garante kualidade bee hodi redús moras mánutrisaun (Stunting) iha Timor-Leste, tanba moras refere dalabarak kauza mós husi bee.
“Kualidade bee importante tebes para oinsá bele redús moras ne’ebé influénsia husi bee liuliu moras mánutrisaun, nune’e Governu nafatin aposta ba kualidade bee,” Prezidente BTL informa ba jornalista sira iha salaun apuramentu CNE, Kolmera, ohin.
Signifika, nia dehan, BTL la’ós atu fornese de’it bee ba komunidade maibé mós tenke garante bee nia kualidade, entaun kualidade bee tenke liuhusi estasaun tratamentu sira iha laboratóriu ne’ebé BTL iha.
“Enkuantu laboratóriu ne’ebé iha la’ós fó teste ba bee galon sira, maibé dalaruma empreza balun haruka teste ba bee minerál liuhusi mekanizmu proposta,” nia dehan.
Tanba, tuir nia, BTL liuhusi DNRAS prepara hela matadalan ba konservasaun perfurasaun bee-moos, liuhusi prosesu sira hanesan tenke iha fatin seguru, konstrusaun ho kualidade, manutensaun regulár, tnmba ne’e asesu de’it husi kanalizasaun BTL tanba iha tratamentu ne’ebé naruk hodi prevene saúde públika.
“Entaun labele halo esplorasaun bee iha rai okos ne’e ninia kontaminasaun boot. Bee rai okos sei menus no mós konstrui safety tank labele besik ho perfurasaun bee se lae bele fó impaktu ba saúde públiku,” nia dehan.
Jornalista : Alexandra da Costa
Editór : Cancio Ximenes
