BAUKAU, 25 Marsu 2026 (TATOLI)—Servisu Rejistrasaun no Verifikasaun Emprezariál, Institutu Públiku (SERVE, I.P.) rekomenda ba institusaun relevante atu halo inspesaun konjunta ba atividade negósiu iha Munisípiu Baukau.
Koordenadór SERVE Baukau, Reinaldo Antônio Mendonça esplika tenke lidera husi Autoridade Munisipál Baukau (AMB) ho objetivu kontrola presu no prazu inklui lisensa atividade negósiu iha merkadu no loja sira.
“Intesaun harii ekipa konjunta ne’e atu instituisaun sira-ne’e tenke toma nia papél, nune’e kada fulan-tolu ka neen tun ba terrenu kontrolu, halo inspesaun ba presu no prazu sasán,” Reinaldo hateten iha Vila Nova, Baukau, Kuarta ne’e.
Reinaldo Mendonça relata papél SERVE mak halo prosesa lisensaementu ba emprezáriu no negosiante sira hodi hala’o atividade komérsiu, enkuantu atu folin no prazu iha merkadu presiza kria ekipa konjunta ne’ebé envolve delegasaun Ministériu Komérsiu no Indústria (MTK) inkluidu AIFAESA lideradu AMB nune’e iha polítika integrada hodi monitoriza produtu nesesidade báziku iha Baukau.
Nia salienta pedidu kriasaun ekipa konjunta ne’e hato’o liuhusi enkontru tanba atu evita mosu manipulasaun sasán nesesidade bázika ne’ebé fa’an iha merkadu maibé to’o atuál seidauk implementa.
Entretantu, totál loja ne’ebé hala’o atividade negósiu ba sasán nesesidade bázika iha Munisípiu Baukau hamutuk 20-resin, enkuantu loja ba ekipamentu materiál konstrusaun hamutuk ualu.
Jornalista: Natalino Belo
Editór: Xisto Freitas da Piedade
