DILI, 30 Marsu 2026 (TATOLI)—Diretora Administrasaun Finansa Lojístika no Aprovizionamentu iha HNVG, Silvia Izina Ximenes, informa agora daudaun empreza Romanfalm96, Unipesoál, Lda, instala ona Closed Circuit Television (CCTV) iha HNGV no tempu badak sei finaliza, nune’e bele halo monitorizasaun ba servisu iha ospitál no mós prevene sasán ne’ebé mak lakon iha areadór HNGV nian.
“CCTV ne’e agora daudaun iha ona prosesu instalasaun nia laran bele dehan atinje ona 75%. CCTV ne’e monta iha areadór ospitál nia laran nian ne’e sei monta hotu, no planu mós atu monta iha parkiran sira tanba CCTV hamutuk 34,” Silvia Izina Ximenes hateten ba jornalista sira iha nia kna’ar fatin, ohin.
Nia informa, objetivu husi monta CCTV ne’e inisiativa husi Konsellu Diretivu husi Hospitál Nasionál Guido Valadares nian atu bele prevene sasán saida ne’ebé mak lakon iha areadór ospitál, tanba sasán sira-ne’ebé lakon iha ospitál la’ós de’it husi família pasiente biab maibe mós funsionáriu ospitál nian mós lakon hotu.
“Objetivu husi monta CCTV ne’e tanba ita hatene problema barak loos iha ospitál, la’ós ba públiku de’it maibé ami sira-nia funsionáriu iha ospitál mós hanesan sempre iha motorizada lakon, iha helem lakon. Dalaruma iha área ospitál laran, dalaruma iha sala internamentu balun iha pasiente balun nia telemovel lakon no sasán lakon. Oinsá mak ita atu prevene sasán sira-ne’e labele lakon, entaun ospitál ho Konsellu iha inisiativa monta CCTV atu bele evita,” nia dehan.
Aleinde atu kontrola sasán sira-ne’ebé mak lakon iha areadór ospitál maibé inklui servisu funsionáriu sira iha Hospitál Nasionál Guido Valadares.
“Ezemplu, ita haree ba área farmásia nian, ai-moruk sira-ne’e tama oinsá, sai oinsá ita bele kontrola ida-ne’e no mós mai ami funsionariu sira mós ami bele kontrola oras tama servisu, sai servisu ita bele kontrola liu husi CCTV ne’e. CCTV ne’e sei monta atu IT sira bele halo monitorizasaun ne’e iha ne’ebá. Karik ami presiza buat ruma, ami sei ba iha ne’ebá mak sira bele hato’o relatóriu mai ami,” nia dehan.
Nia hateten, orsamentu ne’e mak Hospoitál Nasionál Guido Valadares prevee hodi sosa CCTV ne’e hamutuk rihun $19.
“Osan ne’e husi OJE 2025 nian, tanba prosesu aprovizionamentu ne’e nia iha 2025 nia laran ne’ebé orsamentu uza 2025 nian. Nia tama iha pagamentu adiantadu, ne’ebé iha fulan-Abríl nian laran ne’e sei halo pagamentu finál ona,” nia esplika.
Nia relata, alvu husi Hospitál Nasionál Guido Valadares ne’e sei sosa tan tanba prepara ba ospitál andar lima ne’ebé mak iha hela konstrusaun nia laran.
“Albu ba CCTV ne’e agora uza lai 34, depois ba oin mak ita haree to’o tanba ita mós sei presiza ba andar lima ne’ebé mak iha atu monta CCTV ne’e. Planu tinan ida-ne’e nia laran, ami sei aloka tan osan ba CCTV nian hodi halo kompleta,” nia dehan.
Entretantu, CCTV refere sosá husi kompañia lokál Romanfalm96, Unipesoál, Lda, ho montante oeamentu rihun $19.
Jornalista : Felicidade Ximenes
Editór : Cancio Ximenes
