BAUKAU, 31 Marsu 2026 (TATOLI)—Serbisu Munisipál Obra Públika (SMOP) Baukau relata estrada nasionál diresaun Baukau ba Lautein no Dili hamutuk pontu lima presiza hetan atensaun.
Diretór Serbisu Munisipál Obra Públika, Agostinho Ximenes esplika estrada nasionál ne’ebé konesaun entre Munisípiu Baukau bá Lautein no Baukau bá Dili hamutuk pontu lima mak ameasadu estragu iha-ne’ebé presiza hetan atensaun antes estragu totál tanba sei fó impkatu ba movimentasaun transporte.
“Ita kontinua relata ba nasionál tanba bainhira kotu laiha dalan alternativu tanba ne’e ho kondisaun ne’e presiza halo manutensaun lalais urjente,” Agostinho Ximenes hateten iha ninia kna’ar fatin, Vila Nova, Baukau, Tersa ne’e.
Agostinho hatutan estrada iha área Baukau mós hamutuk pontu lima mak hahú estragu hanesan diresaun Baukau ba Lautein lokaliza iha Suku Buruma hamutuk pontu haat kompostu Komuloli, Kaisahe, Daeisi, Doko Bere no diresaun Baukau ba Dili iha pontu ida ne’ebé lokaliza iha área Luliheni, Suku Bukoli.
SMOP Baukau hato’o pedidu referidu ba MOP liuhusi Diresaun Jerál Estrada no ponte hafoin iha fulan-Janeiru identifika no kontinua hamutuk ho tékniku nasionál halo levantamentu dadus.
“Ami relata ona no enjiñeiru husi nasionál foti ona dadus,” Agostinho Ximenes akresenta.
Estrada nasionál diresaun Dili-Baukau hamutuk kilómetru 118 hahú reabilita iha tinan-2013 iha-ne’ebé husi fundu emprétismu JICA hamutuk millaun $68,7 no husi Governu hamutuk millaun $23,9.
Enkuantu estrada diresaun Baukau-Lautein ho distánsia kilómetru 57,6 hahú reabilita iha tinan 2017 ne’ebé maihusi fundu emprétismu husi Banku Dezenvolvimentu Aziátiku (ADB-sigla ingleza) ho montante hamutuk $29.315.346,10.
Jornalista: Natalino Belo
Editór: Xisto Freitas da Piedade
