DILI, 02 Marsu 2026 (TATOLI)—Sekretaria Estadu Igualdade (SEI) kontinua servisu hamutuk ho Ministériu Ensinu Superiór, Siénsia no Kultura (MESSK) diskute atu avansa ho proposta lei asédiu sexuál hodi implementa iha estabelesimentu edukasionál sira.
Sekretária Estadu Igualdade, Elvina Sousa Carvalho, hateten kona-ba proposta lei ne’ebé UNTL submete ba MESSK daudaun ne’e sei iha prosesu.
“Ami servisu hamutuk hela no komunikasaun mós la’o hela, atubele avansa ho proposta lei ne’e. Tanba buat ne’e hanesan proposta hela no sei iha diskusaun,” nia dehan ba jornalista sira iha resintu Palásiu Governu, Kuarta (01/04.
Governante ne’e hatutan parte rua seidauk bele fó sai konteúdu proposta-lei tanba sein iha diskusaun nia laran.
“Iha duni projetu-lei ida, maibé ha’u seidauk bele ko’alia tanba seidauk to’o iha faze finalizasaun. Ita agora ko’alia mak buat ne’ebé iha katak pozisaun Governu nia mak zero toleránsia iha estabelesimentu edukasionál no mós espasu públiku iha ensinu superiór sira. Tanba SEI, MESSK parseiru sira hanesan Ju’s no UN Women, ami servisu hamutuk ho institutu ensinu superiór sira, asina nota entendimentu atubele implementa zero toleránsia ba asédiu sexuál iha ensinu superiór sira. Ida-ne’e la’o hela no universidade barak mak asina ona akordu zero toleránsia ba asédiu sexuál entre dosente ho estudante sira,” nia dehan.
Notísia relevante: KSTL realiza konferénsia feto daruak hodi kombate asédiu seksuál iha servisu fatin
Nune’e mós, Ministru Ensinu Superiór, Siénsia no Kultura, José Honório informa hafoin simu proposta lei husi UNTL, nia parte hato’o ona ba parte jurídika atu haree.
“Ami sei haree hamutuk se sira halo ona ita sei ajusta mós ho proposta husi UNTL nian atubele regula dosente sira,” nia dehan.
Tanba, tuir nia, problema boot iha Timor-Leste, dalabarak sosiedade no akadémiku sira la respeita feto sira.
“Ita-nia sosiedade dalabarak la respeita feto sira, no mós iha kampus, profesór balun la respeita estudante feto sira. Ida-ne’e mak problema boot,” nia katak.
Tanba situasaun ne’e, MESSK estabelese ona akordu ida ho UN Women kona-ba asédiu sexuál. “Se profesór sira komete asédiu sexuál tenke foti sansaun ba nia, labele hanorin no labele orienta estudante sira,” nia dehan.
Jornalista: Osória Marques
Editór: Xisto Freitas da Piedade
