DILI, 19 Dezembru 2025 (TATOLI)—Konfederasaun Sindikatu Timor-Leste (KSTL) realiza konferénsia feto daruak ho tema “Justisa iha servisu fatin: Defende kualidade seguransa no hetan respeita”, atu kombate asédiu seksuál iha servisu fatin.
Prezidente Sesante Komisaun Feto KSTL, Eduarda Miranda Branco, hatete objetivu husi atividade ida-ne’e sira atu halo advokásia hodi tau prioridade ba direitu feto sira-nian atu labele hetan asédiu iha servisu fatin no fatin públiku, tanba dalabarak feto labrani atu foti desizaun no medida hasoru problema sira-ne’e hotu.
“Inisiativa ida-ne’e tanba ita haree ho situasaun ne’ebé mosu iha rai-laran, dalabarak feto sira sempre hetan diskrimisaun entaun atu haforsu mentalidade no kapasidade sira-nia ita presiza halo advokásia beibeik no sensibiliza informasaun hirak ne’e ba traballadór tantu empregadór sira,” Dirijente ne’e informa ba jornalista sira iha sede KSTL, Bemori, ohin.
Nune’e, nia dehan, KSTL ejije nafatin ba Governu atu ratifika lei konvensaun Númeru190 kona-ba asédiu seksuál ne’ebé akontese iha mundu traballadór nian, hodi rezulta presaun ba ema-nia an no viola direitu traballadór nian liuhusi asédiu verbál, naun-verbál no pagamentu ba sálariu mínimu.
“Tanba ita seidauk iha lei espesífiku ida-ne’ebé kle’an atu regula kona-ba violénsia doméstika no asédiu seksuál, entaun KSTL iha ninia polítika atu halo advokásia ba parte hotu-hotu atu iha koñesementu no evita halo diskriminasaun ba direitu feto nian,” nia dehan.
Enkuantu, tinan ida-ne’e, KSTL rejista keixa ne’ebé traballadór sira submete hamutuk keixa lima (5) ho tipu rua hanesan violasaun direitu ba saláriu no mós asédiu iha servisu fatin, kazu hirak ne’e reolvidu kedas husi parte rua no seidauk lori ba prosesu iha Ministériu Públiku.
Jornalista : Alexandra da Costa
Editór : Cancio Ximenes
