VIKEKE, 07 Abríl 2026 (TATOLI) – Organizasaun Nasaun Unida ba Ai-Han no Agrikultura (FAO – sigla Inglés), ohin, entrega ekipamentu produsaun hare ba grupu agrikultór 28 iha postu administrativu Uatulari, munisípiu Vikeke.
Ekipamentu hirak ne’e kompostu hosi tratór liman (tipu kubota) unidade 28, traór bo’ot (Tipu Hercules Tractors) unidade 28, no asesoriu relevante seluk.
Ekipamentu agríkola hirak ne’e entrega liuhosi projetu pilotu transformasaun sistema ai-han no agríkola ne’ebé mak dadaun ne’e implementa hela iha postu administrativu referidu.
Grupu 28 ho membru hamutuk 581 ne’e mai husi suku ualu: Vessoru; Babulu; Afaloikai; Uaitame; Makadique de Baixo; Makadique de Cima; Makadiqe Uaitame no Matahoi.
Reprezentante FAO munisípiu Vikeke, Zaulino Sarmento Gomes, haktuir, membru agrikultór sira sei utiliza ekimpmentu ne’ebé mak simu ona hodi kultiva natar ektare 540.
Nia dehan ekipamentu hirak ne’e oferese ho objetivu atu rezolve problema ne’ebé mak komunidade sira hasoru, liu-liu mukit ba ekipamentu produsaun hare.
Zaulino akresenta ekipamentu hirak ne’e sei hakmaan komunidade sira-nia servisu no fasilita sira hodi hasa’e produsaun hare.
“Durante ne’e ita haree ekipamentu agríkola sai difikuldade bo’ot ba ita-nia agrikultór sira. Tanba to tempu halo natar sira tenke hein ema-nia tratór mak foin halai natar. Tan ne’e, ita apoia ekipamentu sira-ne’e ba ita-nia grupu agrikultór sira”, Zaulino ba TATOL,I.P, iha postu Vikeke Villa, ohin.
Atu garante ekipamentu hirak ne’e utiliza ho didi’ak, Zaulino dehan FAO sei tau-matan no akompaña implementasaun projetu pilotu transformasaun sistema ai-han no agríkola hahú husi prosesu kuda too kolleta.
Alende ne’e, FAO mós sei apoia formasaun kona-ba utulizasaun adubu orgániku hodi hadia estrutura rai no fornese nutriente ne’ebé sufisiente durante produsaun hare. Funsaun principál husi adubu referidu mak aumenta fertilidade rai, no estimula mikro-organizmu di’ak ba hare.
Xefe grupu Haburas Agrikultura husi suku Matahoi, Celestino Pinto, hateten, ekipamentu agríkola ne’ebé FAO entrega sei ajuda komunidade sira intensifika aktividade produsaun hare.
“Ami sei esforsu maka’as atu hasa’e produsaun hare iha tinan ida-ne’e.” nia subliña.
Jornalista: Vitorino Lopes da Costa
Editór: Filomeno Martins
