OEKUSI, 09 Abríl 2026 (TATOLI) – Prezidente Autoridade interinu Rejiaun Administrativa Espesiál Oekusi Ambeno (RAEOA), Celestinho Martinho Marques, garante katak, sei halo jestaun ba ezekusaun Orsamentu Jerál Estadu (OJE) 2026, hodi ezekuta bazeia Planu Asaun Anuál (PAA) 2026 nian.
Celestinho Martinho Marques, informa, perante enkontru dahuluk ho Diresaun Finansa, no Diresaun Planeiamentu Aprovizionamentu hodi aprezenta panorama ezekusaun Orsamentu Jerál Estadu (OJE) 2026 nian ne’ebé Parlamentu Nasionál aloka ba RAEOA.
Notísia relevante:Orsamentu millaun $60 ba RAEOA aprovadu iha espesialidade
Prezidente Autoridade Interinu ba Rejiaun Administrativa Espesiál Oekusi Ambeno (RAEOA), Celestinho Martinho Marques, hateten, objetivu husi enkontru dahuluk ne’e, atu halo aprezentasaun kona-ba Planu Asaun Anuál (PAA), no orsamentu narrativu inklui planu aprovizionamentu 2026 nian.
“Aprezentasaun ne’e ha’u bele apár didi’ak, kona-ba orsamentu ne’ebé aloka mai RAEOA, no osan ne’e dezagrega ba atividade saida, nune’e ha’u apár didi’ak, atu define didi’ak, ida-ne’ebé mak kategória despeza regulár rútina, bele halo jestaun ho di’ak, hodi prepara ba feze ezekusaun,” nia hateten hafoin enkontru iha salaun Gabinete ZEEDOA Oekusi, ohin.
Nia informa, enkontru aprezentasaun ne’e, seidauk konklui sei kontinua filafali iha Sábadu 12 Abríl semana ne’e, atu haree nia planu asaun ba futuru implementasaun, nune’e bele loke ona prosesu aprovizionamentu liliu ba despeza ho kategória regulár, hanesan manutensaun edifísiu, karreta, fornesimentu konbustivél no seluktan.
“Ida-ne’e tenk haree sai prioridade, nune’e fasilita aprovizionamentu atu bele loke prosesu, tuir regra rejíme aprovizionamentu nian,” nia hateten.
Notísia relevante:Tinan ne’e RAEOA laiha projetu foun, kontinua de’it projetu anteriór no selu dívida
Iha biban ne’e, Diretór Jerál Rejiaun Oekusi, Domingos Punef, konsidera enkontru dahuluk importante atu tau matan mós ba prosesu ezekusaun Orsamentu Jerál Estadu (OJE) 2026 nian ba RAEOA.
“Enkontru ne’e atu haree prosesu orsamentu iha Diresaun Planeimentu Aprovizionamentu no Finansa, haree ba forsa traballu nia osan, no kada item ne’ebé integra iha aproviziomentu, ita tenki kontrola bebeik, no ezekuta lalaís, kada trimestre tenki hetan pursentu ne’ebé determina ona iha Lei Ezekusaun Orsamentu, tanba daudaun ne’e tama ona ba trimestre daruak,” nia hateten.
Jornalista: Abílio Elo Nini
Editór: Rafael Ximenes de A. Belo
