BOBONARU,10 Abríl 2026 (TATOLI)-Diretór Asosiasaun Halibur Defisiénsia Rejiaun Oeste (AHDRO), Sebastião de Fátima, husu ba sosiedade, família no komunidade atu hapara estigma no diskriminasaun hasoru ema ho defisiénsia (EhD), no fó oportunidade igual liu-liu iha área edukasaun formál ho non-formál.
Sebastião de Fátima hatete katak tuir dadus provizóriu AHDRO nian, númeru ema ho defisiénsia iha rejiaun oeste to’o ema 680, maibé husi númeru ne’e, ema oituan deit mak asesu ba edukasaun formál tanba hasoru bareirra oi-oin.
Notísia Relevante:AHDRO husu AMB prioriza asuntu defisiénsia iha OJE 2024
“Númeru ida ne’e hatudu katak maioria ema ho defisiénsia seidauk asesu ba eskola tanba menus koñesimentu kona-ba formasaun hanesan letra Braille, no mos tanba estigma no diskriminasaun ne’ebé akontese iha família no komunidade,” dehan Sebastião,iha nia kna’ar-fatin foin lalais ne’e.
Sebastião esplika katak dala-barak família rasik mak fó limitasaun ba oan sira ho defisiénsia, no komunidade mos uza liafuan la dignu, ne’ebé halo sira lakon motivasaun atu kontinua estudu.
Ba ida ne’e, Sebastião afirma AHDRO sei kontinua halo advokasia hodi defende direitu ema ho defisiénsia, tuir Konstituisaun Repúblika Demokrátika Timor-Leste artigu 21 no 16 ne’ebé garante igualidade no direitu hanesan ba sidadaun hotu.
“Ami husu ba parte hotu atu tau a’as asuntu defisiénsia hahu husi baze, no para ho atitude diskriminasaun, tanba ema ho defisiénsia mos iha kapasidade no abilidade hanesan ema seluk,” nia dehan.
Alende ne’e, membru AHDRO, Juliano Ramos, hatete katak antes tama iha organizasaun ne’e, nia la iha koñesimentu klean kona-ba direitu ema ho defisiénsia, maibé agora, nia sente konfiante atu koalia iha públiku no kontinua nia edukasaun non-formál.
Notísia Relevante:Bobonaru prioriza asesibilidade ba EhD iha kualker projetu konstrusaun
“Agora ha’u hatene katak ema ho defisiénsia mos iha direitu atu asesu ba edukasaun no dezenvolve an, maski ami iha limitasaun fizíku, maibé ami mós iha abilidade no mateneke hanesan ho ema la’os defisiensia. Ami defisiensia presiza oportunidade, la’os de’it karidade,” dehan Juliano.
Nia mos apela ba sosiedade atu muda perspetiva hasoru ema ho defisiénsia, tanba maski iha limitasaun físiku, sira mos iha kapasidade atu kontribui ba dezenvolvimentu nasaun.
AHDRO mos hatete katak esforsu advokasia durante ne’e hatudu rezultadu, liu-liu ho dezenvolvimentu asesibilidade iha fatin públiku balu iha Munisípiu Bobonaru.
Organizasaun ne’e sei kontinua halo servisu atu asegura katak ema ho defisiénsia la hela iha kotuk, maibé partisipa ativu iha sosiedade ho direitu no oportunidade hanesan.
Jornalista : Sergio da Cruz
Editora : Armandina Moniz
