BOBONARU, 24 Fevereiru 2026 (TATOLI) – Autoridade Munisípiu Bobonaru inklui iha kualker projetu konstrusaun asesibilidade ba ema ho defisiensia (EhD) atu fó tratamentu hanesan ba sidadaun sira hotu tuir prinsípiu Governu nian katak sei la husik ema ida iha kotuk.
Sekretáriu Autoridade Munisípiu Bobonaru ba Asuntu Administrasaun no Finansas, Domingos da Costa, hateten prioridade ne’e bazeia ba orientasaun husi Primeiru-Ministru, Xanana Gusmão, liuhusi Ministériu Administrasaun Estatál hodi determina katak infrastrutura públika hotu tenke garante asesu ba ema ho defisiénsia.
“Agora projetu hotu-hotu hahú husi aldeia, suku, postu to’o munisípiu tenke iha fatin atu ema ho defisiensia bele asesu”, Domingos hateten iha ámbitu inaugurasaun ba konstrusaun asesiblidade ka rampa iha edifísiu Sentru Juventude Munisípiu Bobonaru, ohin.
Nia rekoñese katak edifísiu autoridade munisipál seidauk iha asesiblidade adekuadu, liuliu atu asesu ba andar leten, ne’ebé sei sai dezafiu ba ema ho defisiénsia, espesialmente sira ne’ebé uza kadeira roda.
Maski nune’e, Domingos afirma katak enkontru no atendimentu ofisiál ne’ebé inklui ema ho defisiensia sei halo iha fatin ne’ebé fásil atu asesu.
“Karik ema ho defisiensia hakarak hasoru Prezidente Autoridade Munisípiu labele sa’e bá andar leten, Prezidente bele tun atende sira tanba prezidente mai atu atende no serví ita hotu hanesan”, nia salienta.
Diretór-Ezekutivu Asosiasaun Halibur Defisiénsia Rejiaun Oeste (AHDRO), Sebastião de Fátima, fiar katak autoridade munisípiu sei tau orsamentu adekuadu no espesífiku ba asuntu defisiénsia, liuliu asesiblidade iha edifísiu públiku hanesan ezemplu ne’ebé Sentru Juventude Munisípiu Bobonaru halo ona konstrusaun asesibilidade ba EhD.
Nia espera katak ho hadi’a asesiblidade, ema ho defisiensia bele asesu servisu públiku ho independénsia no la presiza apoiu husi ema seluk, partikularmente ba sira ne’ebé uza kadeira roda.
Tuir observasaun, projetu PDIM no Programa Nasionál Dezenvolvimentu Suku konstrui infraestrutura bázika sira, inklui mós asesiblidade ba Ema ho Defisiensia.
Aleinde ne’e, projetu reabilitasaun estrada Maliana ho trotoár sira mós iha espasu ba EhD, liuliu defisiénsia matan no fíziku utiliza kadeira roda.
Tuir dadus husi AHDRO, ema ho defisiénsia iha munisípiu Bobonaru hamutuk rihun 3-resin.
Notísia relevante: MJDAK-UNICEF inaugura rampa iha edifísiu SJM Bobonaru
Jornalista: Sergio da Cruz
Editora: Maria Auxiliadora
