MJDAK-UNICEF inaugura rampa iha edifísiu SJM Bobonaru

BOBONARU, 24 Fevereiru 2026 (TATOLI) – Ministériu Juventude, Desportu, Arte no Kultura (MJDAK) hamutuk ho UNICEF iha Timor-Leste inaugura konstrusaun asesivel ba Ema ho Defisiénsia (EhD) ka rampa iha Sentru Juventude Bobonaru (SJB) nu’udar pasu konkretu ida hodi hametin inkluzaun no garante katak laiha joven ida maka husik hela iha kotuk.

Diretór-Jerál MJDAC, David Tomás de Deus, haktuir katak projetu ne’e nu’udar implementasaun Planu Asaun Nasionál ba Ema ho Defisiénsia, ne’ebé nu’udar responsabilidade ministériu nian, no aliña ho prinsípiu Governu nian atu trata sidadaun hotu-hotu hanesan.

“Ami kaer metin ba prinsípiu la husik ema ida iha kotuk. Hanesan ne’e maka ami trata ema hotu hanesan”, nia hatete iha serimonia inaugurasaun.

Reprezentante UNICEF iha Timor-Leste, Patrizia DiGiovanni, konsidera inaugurasaun ba instalasaun asesivel ida-ne’e hanesan marku signifikativu ida, hodi hasai barreira oioin ba joven sira.

Nia subliña katak asesibilidade la’ós luxu ida, maibé direitu fundamentál ida husi labarik no adolesente idaidak.

Ho estabelesimentu instalasaun ida-ne’e, UNICEF hein katak sei sai fatin seguru ba foinsa’e sira hotu atu aprende, halo interasaun, dezenvolve ideia sira, no dezenvolve lideransa. “Iha UNICEF, ami fiar katak bainhira ami investe iha inkluzaun, ami investe iha reziliénsia. Bainhira ami hasai barreira sira, ami loke talentu sira. No bainhira ami fó forsa ba juventude sira, ami transforma sosiedade sira”, nia dehan.

Diretór Sentru Jucentude Munisípiu Bobonaru (SJMB), Alcino Lopes, haktuir katak inaugurasaun ne’e la’ós de’it kona-ba dezenvolvimentu fíziku, maibé reflete mós kompromisu ba justisa sosiál, oportunidade hanesan, no dignidade ba ema hotu.

“Importánsia Konstrusaun Asesibilidade Sentru Juventude Munisípiu Bobonaru tenke sai fatin ne’ebe abertu ba juventude hotu, laiha diskriminasaun, asesibiidade la’ós favór, maibe direitu, konstrusaun rampa, bee-matan asesivel, sinalizasaun, no fasilidade seluk hanesan prova katak ita respeita maluk sira defisiente, ita valoriza partisipasaun inkluziva”, nia dehan.

Diretór-Ezekutivu Asosiasaun Halibur Defisiénsia Rejiaun Oeste (AHDRO), Sebastião de Fátima, dehan asesibilidade ida-ne’e di’ak no furak tebes, bele motiva ema ho defisiénsia sira atu aprende. “Tanba ami defisiénsia ho tipu oioin mós iha vontade hakarak aprende. Ha’u fiar katak sentru sei loke dalan hodi simu ita-nia maluk defisiénsia sira”, katak.

Nia mós espresa nia kompromisu atu habelar programa inkluzivu sira ba oin, inklui kria oportunidade lideransa ba foinsa’e sira ho defisiénsia nu’udar parte ida atu harii jerasaun futuru ida ne’ebé ekuitativu.

Notísia relevante: Trotoár sira iha Maliana asesivel ba EhD no sai ezemplu ba nasionál – ADTL

Jornalista: Sergio da Cruz

Editora: Maria Auxiliadora