LIKISA, 10 Abríl 2026 (TATOLI)—Inspetora Jerál Autoridade Inspesaun Fiskalizasaun Atividade Ekonómiku no Sanitária Alimentár (AIFAESA), Odete Maria Viegas, konsidera importánsia reabilitasaun ba laboratóriu alimentár bele redús teste amostra hahan kontaminadu iha Indonézia.
Nia hatutan, durante ne’e AIFAESA seidauk iha laboratóriu nasionál ida atu halo teste ba aihan kontamidadu sira inklui hahan importasaun no esportasaun, maibé ho esforsu ne’ebé iha ohin loron AIFAESA bele iha ona ninia laboratóriu nasionál ida-ne’ebé bele fasilita sira-nia servisu inspesaun no fiskalizasaun alimentár nian.
“Ho reabilitasaun laboratóriu nasionál ba alimentár ne’e bele ajuda Governu redús teste amostra iha Indonézia no redús ona orsamentu transferénsia ba rai-li’ur,” Inspetora Jerál AIFAESA, relata ba jornalista sira iha edifísiu laboratóriu AIFAESA nian iha Tibar, ohin.
Laboratóriu ne’e rasik mós sai hanesan kritériu atu prienxe rekezitu bainhira ita integra ona iha ASEAN no OMK hodi garante seguransa alimentár no saúde públiku ba ninia populasaun sira.
Nia hatutan, maske prosesu naruk ida ita atu to’o iha jornada ida-ne’e sei hasoru difikuldade barak maibé nafatin iha kompromisu katak to’o loron ida sei realiza mehi ne’ebé iha.
“Tanba ne’e, ami mós iha ona koordenasaun ho IQTL atu halo sertifikasaun no akreditasaun ba laboratóriu ida-ne’e rasik,” nia dehan.
Jornalista : Alexandra da Costa
Editór : Cancio Ximenes
