DILI, 14 Abríl 2026 (TATOLI)–Komandu Munisípiu Dili liuhusi Diresaun Nasionál Investigasaun Kriminál, iha Tersa ne’e, maizumenus tuku 16:30 ezekuta mandadu judisiáriu husi Tribunál Judisiál Primeira Instánsia Dili (TJPID) ho NUC 0010/24.CVTDD hodi halo buska no apreensaun ba edifísiu Federasaun Futeból Timor -Leste (FFTL), iha Bairro dos Grilos.
Durante prosesu ne’e, Autoridade Seguransa asegura karreta rua, kompostu husi karreta kiik no autokarru (bis) ho númeru matríkula 59.240, ne’ebé durante ne’e transporta jogadór sira bá atividade jogu.
Aleinde ne’e, fó biban ba Seksaun Investigasaun Kriminál Komandu Munisípiu Dili no Diresaun Nasionál Investigasaun Kriminál Munisípiu Dili atu halo buska no apreensaun ba objetivu balun tan iha edifísiu FFTL, ne’ebé konsidera nu’udar objetivu aprendidu ba prosesu ne’e.
Notísia relevante : FFTL hili jogadór 23 nu’udar Selesaun Nasionál atu kontra Maldivas
Atuasaun ne’e bazeia ba keixa sira husi COFI Agency hasoru estrutura antigu FFTL, tanba la selu dívidas hahú husi tinan 2021 to’o 2024 tuir kontratu ne’ebé estabelese ona.
Estrutura antigu FFTL la kumpre kontratu, nune’e parte reo nu’udar na’in husi COFI Agency keixa antigu estrutura hato’o keixa ba Tribunál, nune’e hasai mandadu hodi halo apreensaun ba karreta autokarru.
Hafoin ne’e, Autoridade Seguransa kedan objetu apreendidu sira ne’e hodi asegura iha Komandu PNTL Munisípiu Dili hodi halo autus hodi remete ba Ministeriu Públiku.
Iha entrevista, Adjuntu Sekretáriu FFTL, Fernando Baptista Xavier, hateten, Diresaun Nasionál Servisu Investigasaun Kriminál nia asaun ne’e nu’udar parte ida husi prosesu legál ne’ebé la’o hela atu klarifika ba estrutura sesante nia responsabilidade durante mandatu.
“Ida-ne’e kazu dívida tuan ne’ebé seidauk hetan solusaun. Agora autoridade sira mai ezekuta mandadu Tibunál atu halo prosesu legál. Apreensaun ne’ebé Autoridade Polísia mai halo hodi preende Bis ne’e liga ho kazu ne’ebé ita-nia estrutura sesante sira halo iha tinan 2021,2022 to’o 2024 ne’ebé sira halo ba Ajénsia Billete ho naran COFI Agency,” Fernando Baptista informa ba Jornalista sira iha FFTL Bairro dos Grilos, Tersa ne’e.
Nia dehan, kazu ne’e seidauk rezolve nune’e ohin iha ona desizaun no mandadu husi Tribunál hodi halo apreensaun ba Bis FFTL no sei kontinua buka tuir tan mini bus ida seluk.
Jornalista : Natalino Costa
Editora : Julia Chatarina
