BOBONARU, 20 Abríl 2026 (TATOLI)-Komunidade no autoridade lokál sira iha suku Ilat-laun, postu administrativu Bobonaru, munisípiu Bobonaru, organiza malu hodi hadi’ak estrada liga bá Bee-Manas Marobo atu fasilita movimentu ema vizita sítiu turístiku ne’e.
Estrada ne’e hetan danus ne’ebé kauza husi rai halai hafoin akontese udan-boot iha fulan hirak liubá.
Notísia relevante: Governu seidauk prioriza reabilita Bee-Manas Marobo iha 2026
“Ha’u-nia komunidade serbisu voluntariu de’it. Agora karreta bele liu ona bá bee-manas Marobo”, Xefe suku Ilat-laun, Adelino Mau Bere, informa ba Tatoli, ohin.
Maski populasaun hadi’ak ona estrada ne’e, maibé iha futuru kontinua hetan danus bainhira akontese udan ho intensidade boot.
Adelino fiar katak Governu sei tau prioridade iha planu orsamentu hodi halo reabilitasaun ba estrada referida. “Nia sei iha impaktu tanba rai ne’e [fásil atu monu]. Ami só hadi’a, fasilita movimentu karreta ho motór bá-mai. Só iha manutensaun estrada no bee-dalan sira ne’e halai iha nia fatin mak bele di’ak”, nia realsa.
Aleinde ne’e, komunidade postu Bobonaru, Jeremias de Jesus Lopes, husu ba Governu atu halo manutesaun ba infraestrura bázika iha Bee-Manas Marobo, tanba fatin ne’e ba futuru bele kontribui reseita ba munisípiu.
“Aban bainrua Bobonaru tama podér lokál [Bee-Manas Marobo] ne’e asset boot ida. Entaun, ita presiza hadi’a didi’ak, tanba uma, sintina sira ne’e kuaze aat hotu ona. Besi sira ne’e ferrujen hotu. Ita haree ema bá vizita, maibé ladún atrai ema, tanba uma sira la di’ak hotu”, nia dehan.
Bee-Manas Marobo mak destinasaun turístika ho bee-manas naturál ne’ebé lokaliza iha suku Ilat-Laun, postu administrativu Bobonaru, munisípiu Bobonaru. Fatin ne’e fihir husi foho Ilat-Laun no Leolaku, koñesidu ho ninia bee-manas ho temperatura 30°C no 40°C.
Iha tinan 2015, Sekretaria Estadu Polítika Formasaun Profisionál no Empregu (SEPFOPE) liuhusi projetu Turizmu Komunitáriu reabilita no moderniza ona infrastrutura bázika husi ninia orijinalidade.
Sítiu turístiku ne’e reabilita ho totál kustu $498.860 no inaugura iha loron 08 Dezembru 2016 hosi Ministru Planeamentu no Investimentu Estratéjiku, Kay Rala Xanana Gusmão.
Notísia relevante: Líder lokál iha Bobonaru mobiliza komunidade atu hadi’ak dalan bá bee-manas Marobo
Jornalista: Sergio da Cruz
Editora: Maria Auxiliadora
