BOBONARU, 16 Janeiru 2026 (TATOLI)-Xefe suku Ilat-laun, postu administrativu Bobonaru, munisípiu Bobonaru, Adelino Mau Bere, hamutuk ho nia estrutura sei mobiliza komunidade atu halo servisu komunitáriu hodi hadi’ak estrada liga bá Bee-Manas Marobo, ne’ebé hetan estragu hafoin akontese udan-boot foin lalais ne’e.
Mau Bere dehan daudaun ne’e nia parte sei prepara proposta atu submete ba Sentru Solidariedade Sosiál Munisípiu Bobonaru atu apoia ai-han hodi tulun servisu komunitáriu ne’e.
Nia argumenta katak líder komunitáriu no populasaun sira hakarak foti asaun ne’e atu fasilita komunidade sira bele kontinua paseiu no hariis iha bee-manas Marobo, tanba provizoriamente transporte labele asesu bá sítiu turístiku ne’e.
Notísia relevante: Falta manutensaun halo Bee-Manas Marobo sai preokupasaun komunidade nian
Xefe suku ne’e afirma katak inisiativa ne’e halo tanba pedidu ba reabilitasaun estrada no fatin turizmu ne’ebé antes ne’e submete ona proposta ba Autoridade Munisípiu Bobonaru no Governu sentrál la konsidera iha prioridade orsamentu tinan 2026.
“Ami halo serbisu ho manuál de’it, la hein planu Governu nian para movimentu karreta no motór nia bele bá-mai nafatin bá bee-manas. Ami hadi’a para Governu bele bá haree kondisaun estrada, bee-matan, no uma sira ne’e”, nia dehan
Bee-manas Marobo ne’ebé lokaliza iha foho Illat-laun nia hún, iha munisípiu Bobonau, hori uluk kedas rekoñese nu’udar destinasaun turístik. Nune’e Sekretaria Estadu Polítika Formasaun Profisionál no Empregu (SEFOPE), liuhusi projetu Turizmu Komunitáriu reabilita no moderniza ona infrastrutura bázika husi ninia orijinalidade.
Reabilitasaun ne’e halo iha tempu Sekretáriu Estadu Formasaun, Profisionál no Empregu, Ilídio da Costa Ximenes, iha 2015, ho totál kustu $498.860 no inaugura iha loron 08 Dezembru 2016 husi Ministru Planeamentu no Investimentu Estratéjiku, Kay Rala Xanana Gusmão.
Notísia relevante: Horta preokupa infraestrutura bee-manas Marobo ho kondisaun ferrujen
Jornalista: Sergio da Cruz
Editora: Maria Auxiliadora
