DILI, 23 Fevereiru 2026 (TATOLI)—Governu liuhusi Ministériu Turizmu no Ambiente (MTA) seidauk fó prioridade atu halo reabilitasaun ba sítiu turístiku Bee-Manas Marobo ne’ebé lokaliza iha Suku Ilat-laun, Postu Administrativu Bobonaru, Munisípiu Bobonaru ne’ebé oras ne’e daudaun kondisaun infraestrutura aat hela.
Notísia Relevante: Líder lokál iha Bobonaru mobiliza komunidade atu hadi’ak dalan bá bee-manas Marobo
“Ami seidauk prioriza ba 2026 tanba ita presiza kompleta asesibilidade estrada no demanda (vizitante) ladun barak. Signifika iha tempu de’it mak vizitante sira ba vizita maibé sira konsidera ida-ne’e tanba fasilidade balun estragadu no sira sei haree fali orsamentu iha programa ba reabilitasaun fasilidade sítiu turístiku. Tanba, kada tinan, programa ne’e sempre prevee orsamentu no sei haruka ekipa tékniku ba halo levantamentu dadus,” Diretór Dirasaun Nasionál Dezenvolvimentu Turístiku, Luís Imanuel Doutel, informa ba Agência Tatoli iha nia kna’ar fatin, Vila Verde, ohin.
Nia hatutan, atu reabilita sítiu turístiku bee-manas Marobo, tenke normaliza asesibilidade infraestrutura estrada.
Sítiu turístiku bee-manas Marobo nia kondisaun aat duni ona, maibé Ministériu Turizmu no Ambiente seidauk iha planu konkretu atu reabilita fali fasilidade sira ba tinan ida-ne’e no ba tinan oin.
Tanba, nia dehan, bazeia ba relatóriu iha tinan kotuk husi Banku Mundiál nian katak presiza kompleta komdisaun asesibilidade sira hanesan estrada, entaun Ministériu Turizmu lee ona rezultadu relatóriu estudu ida-ne’e.
Daudaun ne’e, nia dehan, Governu prioriza hela projetu sira seluk hanesan iha Na’in Feto Ramelau, maske dalan aat maibé demanda vizitante ne’e sempre iha kada loron.
Seluk tan, tuir nia, Governu sei fó prioridade ba turizmu komunitária iha Fleixa, turizmu relijiozu santuáriu Soibada no praia Watabou Baukau.
Notísia Relevante: Horta preokupa infraestrutura bee-manas Marobo ho kondisaun ferrujen
Jornalista : Alexandra da Costa
Editór : Cancio Ximenes
