DILI, 21 Abríl 2026 (TATOLI) – Sekretáriu Estadu Komunikasaun Sosiál (SEKOMS), Expedito Loro Dias Ximenes, informa katak rádiu komunidade tolu hetan suspensaun husi Governu liuhusi SEKOMS tanba komete má administrasaun.
Rádiu Komunidade tolu ne’e mak hanesan Rádiu Komunidade Taroman Kovalima, Rádiu Komunidade Rai Husar Aileu no Rádiu Komunidade Komoro.
Tanba ne’e iha asina kontratu servisu, SEKOMS deside la apoiu rádiu komunidade sira ne’e razaun to’o agora seidauk iha relatóriu ba ezekusaun.
Notísia relevante:SEKOMS prevee verba 240.000 hodi apoia atividade Rádiu Komunidade
“Rádiu komunidade iha 22 maibé iha tolu mak seidauk asina tanba sira iha problema ho sira-nia jestaun, no ohin ita asina kontratu ho rádiu komunidade sanulu-resin-ualu nune’e. Tinan-tinan governu aloka osan ba apoiu ba rádiu komunidade sira”, nia dehan.
Razaun halo suspensaun ba rádiu komunidade tolu ne’e, tuir Sekretáriu Estadu Expedito, tanba iha má-jestaun nune’e Governu labele fó osan se sira seidauk halo relatóriu ne’ebé loos. Basá, osan Estadu nian povu nian, bainhira fó ba, no sira seidauk halo relatóriu.
“Hanesan ohin ha’u dehan, dala barak iha tempu ne’ebé sira husu atu sosa antena, dalaruma sira muda fali ba halo buat seluk. Ida-ne’e mak regra, lei la fó dalan. Tanba ne’e mak ami agora hanesan tau keta-ketak fali sira na’in tolu. Agora rádiu komunidade tolu seidauk bele hetan apoiu, maibé iha tempu oin mai bainhira sira hadi’a fali, Governu sei fó fali atensaun ba ida-ne’e.
Governante ne’e haktuir katak durante ne’e relatóriu husi rádiu komunidade tolu ne’e la tuir regra ne’ebé mak iha.
“Ita sei haree hela no hein katak iha tempu oin mai sira mós bele hato’o fali sira-nia relatóriu ho di’ak, hodi depois governu bele fó fali atensaun, ajuda fali sira tuir sira-nia proposta ne’ebé sira iha”, nia espera.
SEKOMS husu ba jestór rádiu komunidade sira katak, ne’e osan povu nian, osan Estadu nian, osan povu nian tenke jere ho di’ak.
“Tanba dala barak ema barak hanoin katak tanba ne’e transferénsia públika, ne’ebé bele halo tuir ita-nia hakarak de’it. Maske ne’e transferénsia públika maibé nafatin iha responsabilidade atu halo relatóriu mai iha Governu”, nia dehan.
Jornalista: Natalino Costa
Editór: Rafael Ximenes de A. Belo
