DILI, 22 Abríl 2026 (TATOLI)-Institutu Nasionál Estatístika Timor-Leste (INETL) rejista inflasaun 0,6% iha Índise Presu Konsumidór ba fulan-Marsu 2026, kompara ho Fevereiru iha deflasaun 0,1%.
Tuir dokumentu ne’ebé Tatoli asesu, aumentu presu iha grupu hotu sa’e 0,6%, tanba hetan kontribuisaun husi grupu alkohol no tabaku 2,6%, hahán no bebida la’ós alkólika 0,3%, transporte 2,5% no ekipamentu no manutensaun mobiliáriu uma laran 0,2%.
“Grupu hahán no bebida la’ós alkólika sa’e 0,3% tanba hetan impaktu maioria husi subgrupu modo-tahan 0,6%, susubeen, keiju no manutolun 2,7%, bee, bebida jus ai-fuan no modo-tahan 3,7%, ai-fuan 0,9%, foos 0,1% no ikan no hahán tasi 1,2%”, refere komunikadu.
Ba subgrupu na’an tun 0,1%, mina no bokur 0,6%, no masin-midar, marmelada, bani-been, xokolate no hahán midar 0,4%, ne’ebé sai hanesan mudansa kontráriu ba inflasaun grupu hahán no bebida la’ós alkólika ba Marsu 2026.
Relatóriu ne’e hateten katak mudansa persentajen IPK anuál sa’e 0,8% kompara entre fulan-Marsu tinan-2026 no Marsu 2025, hetan kontribuisaun husi grupu hahán no bebida la’ós alkólika sa’e 1,3%, transporte 2,0%, edukasaun 0,3% ekipamentu no manutensaun mobiliáriu uma laran 0,7%, no hatais no sapatu 0,3% ba anuál Marsu 2026.
Grupu alkohol no tabaku tun 1,1%, komunikasaun 0,3% no uma 0,3%, ida-ne’e sai hanesan mudansa kontráriu ba inflasaun grupu hotu ba anuál Marsu 2026.
Inflasaun Tradeable sa’e 0,8% no non-Tradeable laiha mudansa 0,0% iha mensal, kompara entre Marsu 2026 no Fevereiru 2026. Inflasaun Tradeable sa’e 0,9% no non-Tradeable sa’e mós 0,8% iha anuál.
Notísia relevante: Fevereiru 2026, inflasaun Índise Presu Konsumidór iha TL diminui ba 0,1%
Jornalista: Arminda Fonseca
Editora: Maria Auxiliadora
