DILI, 22 Abríl 2026 (TATOLI) – Embaixadór Malázia iha Timor-Leste, Dato’ Amarjit Sarjit Singh, despede Prezidente Parlamentu Nasionál (PPN), Maria Fernanda Lay, antes mandatu ramata iha tempu badak.
Iha sorumutu ne’e aborda kona-ba relasaun amizade ne’ebé forte entre nasaun rua no promesa sira ba kooperasaun ne’ebé boot liu iha futuru, liuliu bainhira Timor-Leste komesa hala’o papél ativu liu iha Asosiasaun Nasaun Sudeste Aziátiku (ASEAN, sigla inglés) no iha komunidade internasionál.
Lembra katak, iha 16 Abríl, Prezidente Repúblika, José Ramos-Horta, kondekora Kolár Orden Timor-Leste nian ba Embaixadór Estraordináriu no Plenipotensiáriu Malázia nian iha Timor-Leste, Dato’ Amarjit Sarjit Singh.
Orden Timor-Leste mak nasaun nia onra aas liu, ne’ebé fó ba individuál sira ne’ebé hala’o ona serbisu esepsionál no meritóriu ba nasaun.
Embaixadór Dato’ Amarjit Sarjit Singh simu distinsaun ida-ne’e tuir Dekretu Prezidente Repúblika Nº.42/2026, nu’udar rekoñesimentu ba ninia serbisu esepsionál hodi hametin relasaun bilaterál entre Timor-Leste no Malázia.
Durante nia mandatu hahú husi Marsu tinan 2023 to’o Abríl tinan 2026, hametin signifikativamente relasaun bilaterál sira, hodi avansa inisiativa xave sira inklui akordu konsesaun rai iha Dili, estabelesimentu ligasaun aérea direta entre Kuala Lumpur no Dili.
No arranjamentu kona-ba izensaun ba vistu, konkluzaun Memorandu Entendimentu (MoU) iha ensinu superiór, telekomunikasaun, mídia no informasaun, dezenvolvimentu rurál, no defeza.
Nia mós fasilita série renovada kompromisu sira iha nivel aas, inklui vizita sira husi Primeiru-Ministru Anwar Ibrahim iha tinan 2025 no Vise-Primeiru-Ministru Ahmad Zahid Hamidi iha tinan 2024 mai Timor-Leste.
Nia iha papel instrumentál hodi avansa inisiativa sira ba kapasitasaun, liuliu habelar Programa Kooperasaun Téknika Malázia nian hodi fó benefísiu ba funsionáriu públiku timoroan liu 500 iha períodu badak menus husi tinan tolu nia laran, no kontribui ba grupu primeiru estudante timoroan sira ne’ebé hetan bolsa estudu hodi hala’o estudu iha Malázia hahú iha tinan 2024.
Importante liu, ninia mandatu koinside ho Timor-Leste nia adezaun ba ASEAN iha tinan 2025 durante Prezidénsia Malázia nian, ne’ebé marka realizasaun ne’ebé subliña parseria estratéjika ne’ebé aprofunda entre nasaun rua ne’e.
Jornalista: Nelson de Sousa
Editora: Maria Auxiliadora
