DILI, 29 Abríl 2026 (TATOLI)—Prezidente Repúblika, José Ramos-Horta, deklara Antigu Jornalista Timor-Leste, Otélio Ote, merese hetan rekoñesimentu husi Estadu.
“Nu’udár Prezidente Repúblika no nu’udár sidadaun, tinan barak nia laran ha’u koñese no haree ninia atividade. Ne’e duni, Otelio Ote, ema ida-ne’ebé merese hetan rekoñesimentu hosi Estadu Timor-Leste nian,” Ramos-Horta ba jornalista sira hafoin presta omenajen ikus ba saudozu jornalista sénior, Otélio Ote, iha rezidénsia Fomentu, Dili, Kuarta ne’e.
Notísia relevante: Otélio Ote figura edukadór-formadór-mentór iha mundu jornalizmu
Xefe Estadu dehan durante ne’e nia simu pedidu kondekorasaun maihosi ema barak, tan ne’e nia rasik hakarak duni atu kondekora nia (Ote).
Kona-ba lutu nasionál, Ramos Horta dehan, kuandu jornalista sira husu, Prezidente Repúblika prontu fó.
“Família husu ha’u, ha’u dehan sim. Ne’e figura ida nasionál, maibé desizaun ne’e tenke maihosi Governu,” Horta esplika.
Jornalista: Osória Marques
Editór: Xisto Freitas da Piedade
