DILI, 30 Abríl 2026 (TATOLI)—Prezidente Repúblika, José Ramos-Horta, kinta ne’e, kondekora Medalla Orden Timor-Leste nian ba esploradór, industriál no aventureiru renomadu britániku, Sir David Hempleman-Adams.
Kondekorasaun ida-ne’e atribui tuir Dekretu Prezidente Repúblika Nú. 47/2026, nu’udar rekoñesimentu ba esforsu no dedikasaun Sir David Hempleman-Adams nian, ne’ebé fó benefísiu ba sidadaun timoroan lubuk ida iha tinan hirak nia laran.
“Sir David, ita-nia moris define husi korajen, perseveransa, no espíritu esplorasaun ne’ebé la rende. Ita-boot fó hanoin mai ami katak laiha limitasaun ba buat ne’ebé ita bele atinje. Ita-nia vizita ba ami-nia eskola sira kuda fini ambisaun nian iha ami-nia foin-sa’e sira, hodi hanorin sira katak grandeza la’ós mai husi priviléjiu, maibé husi perseveransa,” Prezidente Ramos-Horta hateten iha nia diskursu, iha Palásiu Prezidensiâl Nicolau Lobato, Bairru Pite.
Nia dehan, lori povu Timor-Leste nia naran, fó onra ba buat ne’ebé mak Sir David halo ona ba Timor-Leste liuhusi nia esforsu sira hotu.
“Hein katak Ita-nia ezemplu bele inspira ami-nia nasaun joven atu bele iha mehi ne’ebé aas liután, atu prezerva ba tempu naruk no atu fiar katak laiha orizonte ida-ne’ebé mak ita labele alkansa,” nia dehan.
Orden Timor-Leste mak nasaun nia onra aas liu, rezerva ba individuál sira-ne’ebé hala’o ona servisu esepsionál no méritu ba nasaun.
Sir David Hempleman-Adams koñesidu hanesan ema dahuluk ne’ebé to’o iha Pólu Súl Jeográfiku no mós iha Pólu Magnétiku Norte no Súl.
Nomeadu ba nia servisu sira ba esplorasaun, nia lidera ona espedisaun barak ho perfil aas iha ambiente polar no altitude aas, ne’ebé hatudu rezisténsia, lideransa no reziliénsia ne’ebé esepsionál.
Liuhusi nia serbisu, nia promove dezenvolvimentu foin-sa’e nian, konxiénsia ambientál, no valór sira husi perseveransa no jestaun risku ne’ebé disiplinadu.
Ninia esperiénsia oferese plataforma ida-ne’ebé forte atu inspira estudante sira no komunidade sira kona-ba lideransa, reziliénsia no responsabilidade ambientál globál.
Jornalista : Hortêncio Sanchez
Editór : Cancio Ximenes
