DILI, 01 Maiu 2026 (TATOLI) – Primeiru-Ministru (PM), Xanana Gusmão, foin lalais bolu atenssaun ba Autoridade Aduaneira (AA/Alfándega) kona-ba kazu osan falsu ho valór millaun $4-resin, tanba la halo inspesaun rigoroza ba sasán sira ne’ebé tama iha pontu entrada sira.
Komisáriu Autoridade Aduaneira, Joanico Pinto, konsidera katak deklarasaun ne’e hanesan orden ida ba instituisaun.
“Ha’u hakarak hateten ho loloos no momoos katak ha’u respeita segredu justisa no prosesu judisiáriu ne’ebé la’o hela, nune’e ha’u lakohi halo komentáriu ruma ba iha prosesu ida-ne’e. Relativamente ho deklarasaun Primeiru-Ministru nian, nu’udar Komisáriu, ha’u konfirma ida-ne’e orden ida mai Alfándega”, Joanico Pinto dehan ba Tatoli.
Tuir nia, deklarasaun Xefe Governu nian fó énfaze ba nesesidade atu reforsa serbisu Alfándega nian no nafatin halo esforsu másimu hodi kontrolu didi’ak pontu entrada sira.
“Ha’u-nia devér no obrigasaun mak atu simu orden ida-ne’e, halo análize, mapeamentu interna hodi identifika problema sira ne’ebé ami iha. Se ami bele rezolve, ami rezolve tiha. Se ami labele tanba iha buat balun ne’ebé keta aas liu ami-nia kompeténsia atu halo desizaun karik, ami sei aprezenta fali ba eselénsia ministra no Primeiru-Ministru para bele hetan desizaun ruma”, dehan.
Ho ida-ne’e, Alfándega afirma katak prontu atu nafatin kumpre orientasaun Governu nian, halo análize ida kle’an, no halo mapeamentu ba problema sira hotu.
Lembra katak Polísia Nasionál Timor-Leste (PNTL) deteta osan falsu millaun $4-resin iha armazein ida iha Bidau, iha loron 15 Abríl 2026.
Antes ne’e, Xefe Governu dehan osan kópia sira ne’e tama liuhusi Alfándega no na’in ba sasán mak sidadaun xinés sira, ne’ebé selu mós taxa.
“Sala uitoan iha Alfándega, tanba haree de’it afinál sira selu duni, más iha items ne’e la’ós osan falsu, maibé osan ida halimar nian no iha manifest ne’e sira dehan boneka, ne’ebé liu tiha, afinál bosok Alfándega”, Xanana Gusmão hato’o foin lalais hafoin halo vizita bá Kuartél Jerál PNTL, Kaikoli.
Notísia relevante: Sirkulasaun osan falsu, Xefe Governu bolu atensaun ba Alfándega nia kontrolu
Jornalista: Arminda Fonseca
Editora: Maria Auxiliadora
