Husi Joaquim Chaves
Iha sistema multilaterál ohin loron, podér la’ós de’it depende ba kapasidade ekonómika ka militár, no la limita de’it ba manifestasaun liuhusi diskursu ofisiál ka votasaun. Iha Nasoens Unidas, podér dala barak asume forma ne’ebé kompleksu no sofistikadu, liuhusi kapasidade atu kontrola no influénsia mekanizmu institusionál sira ne’ebé regula prosesu deliberativu no orienta foti desizaun. Prosedimentu sira, maske frekuentamente konsidera hanesan aspetu tékniku, iha realidade dezempeña papél sentrál hanesan instrumentu atu jere diskusaun, define regra sira negosiasaun no orienta rezultadu polítiku iha sistema multilaterál.
Evolusaun ida-ne’e hamosu konseitu diplomasia prosedimentál (Procedural Diplomacy), ne’ebé refere ba kapasidade atu kompriende, uza no jere regras, normas no prosedimentu sira iha fórum multilaterál ho maneira estratéjika. Elementu hanesan definisaun ajenda, jestaun tempu debate, sekuénsia intervensaun, no redasaun dokumentu, fó vantajen estratéjiku atu determina oinsá asuntu ida sei diskuti, no oinsá konsensu sei atinzi. Nune’e, podér la’ós de’it sentraliza iha substánsia, maibé mós iha prosesu ne’ebé orienta no limita espasu deliberasaun polítika.
Perspetiva institusionalismu neoliberal husi Robert Keohane, ajuda esplika fenomenu ida-ne’e. Instituisaun internasionál sira fornese “regras do jogu” ne’ebé atór sira uza ho kalkulu estratéjiku atu maximiza sira-nia interese. Iha kontestu ida-ne’e, prosedimentu la’ós estrutura pasiva; pelo kontráriu, sai rekursu polítiku ne’ebé bele uza atu altera balansu podér. Ba Nasaun ki’ik sira, dominiu ba regras no prosedimentu bele permite esplora espasu institusionál atu kompensa limitasaun materiál, liuhusi influénsia indireta ba prosesu no rezultadu negosiasaun.
Iha fórum sira hanesan Asembleia Jerál Nasoens Unidas (UNGA) no Konsellu Ekonómiku no Sosiál (ECOSOC), evidénsia hatudu katak prosedimentu sai meiu prinsipál atu defende interese nasionál no grupu. Koordenasaun iha grupu sira hanesan Alliance of Small Island States (AOSIS), Group of 77 (G77) no China, no Non-Aligned Movement (NAM) permite integrasaun prioridade nasional no grupu iha ajenda no dokumentu final. Liuhusi utilizasaun mekanizmu prosedimentál, hanesan koordenasaun intervensaun, proposta emenda ka alterasaun ba linguajen, no envolvimentu direta iha redasaun dokumentu, grupu sira ne’e transforma frajilidade individual ba influénsia koletiva, liu-liu iha prosesu negosiasaun iha ámbitu multilateral ne’ebé depende ba konsensu.
Dinámika koletiva ida-ne’e liga diretamente ho forma oinsá Nasaun sira utiliza diplomasia prosedimentál iha área temátika espesífika. Nasaun sira ne’ebé iha interese forte iha área espesífika, por izemplu iha área sira hanesan: mudansa klimátika, dezenvolvimentu sustentável, lei internasional, ka pás no seguransa internasionál, sei investe rekursus no tempu iha kontrolu mekanizmu prosedimentál ne’ebé relevante. Ida-ne’e inklui esforsu atu orienta ajenda, jere diskusaun sira, no influensia redasaun dokumentu final. Nune’e, koordenasaun prosedimentál iha nível grupu la’ós de’it aumenta influénsia koletiva, maibé mós funsiona hanesan ponte ne’ebé liga interese substantivu ho rezultadu polítiku konkretu iha sistema multilateral.
Efetividade grupu sira iha utilizasaun diplomasia prosedimentál bele haree klaramente iha rezultadu negosiasaun iha área temátika sira. Alliance of Small Island States (AOSIS), por izemplu, hatudu kapasidade forte iha koordenasaun prosedimentál atu promove asuntu mudansa klimátika no protesaun oseánu. Liuhusi prezensa ativa iha definisaun ajenda no redasaun dokumentu, AOSIS konsege asegura katak vulnerabilidade Nasaun ilha ki’ik sira refleta iha akordu internasionál sira.
Hanesan mos, Group of 77 (G77) no China dezempeña papel sentrál iha avansu ajenda dezenvolvimentu, inklui kooperasaun Sul-Sul no direitu ba dezenvolvimentu. Liuhusi bloku koletivu ne’ebé forte no estratéjia prosedimentál ne’ebé koordenadu, G77 konsege influénsia negosiasaun iha ECOSOC no UNGA atu asegura katak prioridade Nasaun ki’ík sira tama iha rezolusaun no programa ONU nian.
Iha área pás no seguransa internasional, Non-Aligned Movement (NAM) utiliza diplomasia prosedimentál atu defende prinsípiu soberania, la-intervensaun no solusaun pasífika ba konflitu sira. Liuhusi artikulasaun pozisaun komún no utilizasaun mekanizmu institusionál sira, NAM orienta diskusaun polítika no limita tentativa husi Nasaun seluk sira atu impoin ajenda ne’ebé la alinha ho interese membru sira.
Experiénsia grupu sira ne’e konfirma katak dominiu prosedimentál iha aréa prioridade temátika sira ne’ebé relevante ba interese grupo, mak sai núdar fator determinante ida ba susesu iha diplomásia multilaterál.
Dimensaun krusiál ida husi diplomasia prosedimentál mak kontrolu ba prosesu redasaun dokumentu hanesan rezolusaun, deklarasaun polítika, tratadus, no konvensaun sira. Elaboração “zero draft” estabelese narrativa inisial no limita opsaun ba negosiasaun tuir mai. Nasaun ka grupu ne’ebé assume papel hanesan Chair, Co-Chair ka fasilitadór iha kapasidade atu servisu hamutuk ho Sekretariadu ONU hodi define linguajen, prioriza tópiku, no orienta diresaun negosiasaun ka debate iha koridor ne’ebé defini ona. Prátika ne’e hatudu katak influénsia prosedimentál bele hahu desde faze inísiu husi negosiasaun, to’o iha momentu votasaun final.
Aleinde mekanizmu formál, espasu informal sira mos dezempeña papél determinante. Konsulta informal, no fasilitasaun ba negosiasaun permite lider sira regula ritmu deliberasaun, propoin linguajen no orienta diskusaun ba rezultadu espesífiku. Iha kontextu ida ne’e, dala barak rezultadu final depende liu ba jestaun prosesu duké votasaun formál rasik.
Paralelamente, kompetisaun atu okupa pozisaun institusionál estratéjiku sai parte integrante husi diplomasia prosedimentál. Eleisaun ba prezidénsia komité husi Assembleia Jerál (UNGA), asentu iha órgaun subsidiáriu sira hanesan Konselhu Ekonómiku no Sosiál (ECOSOC) no seluk tan, no mós nomeasaun hanesan fasilitadór ka co-fasilitador ba prosesu multilateral importante ruma , bele fó asesu diretu ba kontrolu prosesu deliberativu. Izemplu konkretu mak eleisaun ba membru ECOSOC, ne’ebé Nasaun sira kompete ativamente atu hetan asentu. Iha eleisaun, grupu rejionál sira promove kandidatura ho kampaña diplomátika intensiva tanba asesu ba konselhu ne’e la’ós de’it prestíjiu, maibé mós permite membru sira influénsia ajenda dezenvolvimentu, lidera diskusaun temátika no orienta prosesu redasaun rezolusaun no desizaun sira. Ida-ne’e hatudu katak asesu ba pozisaun institusionál diretamente liga ho kapasidade atu influensia rezultadu polítiku iha sistema multilateral.
Ba Nasaun ki’ik sira, partisipasaun iha grupu koletivu sai estratéjia esensiál. AOSIS, G77 no China, no NAM, fó espasu atu partilla informasaun, harmoniza pozisaun no koordena estratéjia. Mekanizmu hanesan definisaun porta-voz únika no pozisaun komún, aumenta kapasidade negosiasaun no vizibilidade internasionál husi Nasaun membru AOSIS, G77 no China, no NAM, ne’ebé maoria mesak Nasaun ki’ik, inklui Timor-Leste. Experiénsia grupu sira ne’e hatudu katak influénsia la depende de’it ba dimensaun Nasaun nian, maibé mós ba kapasidade atu mobiliza grupu no utiliza prosedimentu ho efisiénsia.
Maski nune’e, limitasaun estrutural kontinua dezafia Nasaun ki’ik sira. Kompleksidade regras, negosiasaun paralelu, no falta iha rekursu umanu no espesializasaun téknika, bele limita kapasidade Nasaun ki’ik sira. Aleinde ne’e, Nasaun bo’ot sira kontinua iha vantajen tanba sira-nia kapasidade ekonómika bo’ot no rede diplomátika ne’ebé luan, hodi bele tradús ba influénsia indireta iha prosesu prosedimentál.
Atu responde ba dezafiu sira ne’e, Nasaun ki’ik sira presiza investe iha kapasidade diplomátika, espesialmente iha kompriensaun no utilizasaun prosedimentu multilaterál sira. Formasaun espesializada, kontinuidade institusionál, no envolvimentu ativa iha negosiasaun, inklui esforsu atu hetan pozisaun lideransa, mak sai núdar kondisaun esensiál atu transforma partisipasaun ba influénsia real.
Nudar konkluzaun, diplomasia prosedimentál sai mekanizmu sentrál iha distribuisaun podér iha Nasoens Unidas. Iha sistema ne’ebé regras no prosedimentu define limite no oportunidade, kapasidade atu jere prosesu deliberativu, redasaun dokumentu no koordenasaun koletiva, sai forma prinsipál atu ejerse influénsia. Ba Nasaun ki’ik sira, inklui Timor-Leste, dominiu ba diplomasia prosedimentál la’ós de’it vantajen estratéjiku, maibé sai kondisaun fundamentál atu asegura partisipasaun efetiva no relevánsia iha governansa globál iha futuru.
