VIKEKE, 05 Maiu VIKEKE (TATOLI)—Prezidente Autoridade Munisípiu Vikeke， Francisco C. S. de, Gonzaga Soares, informa edifísiu Balkaun Úniku (BU) ba Munisípiu Vikeke daudaun ne’e hahú ona iha faze reabilitasaun.
“Kona-ba prosesu estabelesimentu Balkaun Úniku ba Vikeke ita komesa halo reabilitasaun ba antigu edifísiu administrasaun tempu portugés nian iha Vikeke Vila. Ita haree ninia progresu servisu la’o di’ak. Ita hein empreza konklui tiha reabilita ita bele uza ona ba atendimentu ba ita-nia populasaun,” Francisco ba TATOLI iha Postu Vikeke Vila, Tersa ne’e.
Autoridade ne’e esplika obra reabilitasaun ne’e responsabiliza husi empreza Dira Nova Unipessoal, Lda ne’ebé hetan ajudika husi Programa Fundu Nasaun Unida ba Dezenvolvimentu (UNDP-sigla ingleza) tanba finansia husi UNDP servisu hamutuk ho Ministériu Administrasaun Estatál (MAE).
Balkaun Úniku hanesan fonte konfiavel ida no seguru ba asesu informasaun kona-ba prosedimentu ba asesu servisu públiku, konstitui hanesan feramenta importante ida ba transparénsia ativa.
Tuir dadus, populasaun Munisipiu Vikeke totál hamutuk 102.637 (projesaun 2019), iha-ne’ebé munisípiu ne’e kompostu husi postu lima (5) hanesan Lakluta, Uatukarbau, Ossú, Uatulari no Vikeke Vila.
Jornalista: Vitorino Lopes da Costa
Editór: Xisto Freitas da Piedade
