DILI, 05 Maiu 2026 (TATOLI) – Prezidente Repúblika, José Manuel Ramos Horta, elojia negosiasaun ba delimitasaun fronteira marítima entre Timor-Leste (TL) no Repúblika Indonézia (RI) iha ronda datoluk nian, durante loron tolu, entre 27 no 29 Abríl, iha Singapura, la’o ho ambiente pozitivu.
Xefe Estadu, fiar prosesu ne’e sei kontinua hodi muda país rua sai relasaun metin no di’ak liután atu hatudu ba mundu.
Liuhusi dalan diálogu no negosiasaun país sira bele hetan entendimentu ida ne’ebé konstrutivu no pozítivu.
Nia lembra katak uluk Timor-Leste ho Austrália hatudu ba mundu diferensa polítika no legál kona-ba fronteira marítima, maibé ikus mai bele rezolve liuhusi negosiasaun.
Nia subliña papél importante Primeiru- Ministru, Kay Rala Xanana Gusmão, nian iha prosesu ne’e.
“Agora ita-nia fronteira terrestre no iha fronteira marítima bele liuhusi diálogu negosiasaun ne’ebé Primeiru-Ministru Kay Rala Xanana Gusmão dirije ne’ebé la’o di’ak. Ha’u fiar iha tempu badak sei iha solusaun ba problema rua ne’e, fronteira terrestre iha Oekusi no marítima ho Indonézia,” nia hateten iha edifísiu Komisaun Funsaun Públika, Matadouru, kuarta ne’e.
Xefe Estadu, ho konfiansa ne’ebé forte iha diálogu no negosiasaun, iha tempu badak problema fronteira rua ne’e sei hetan solusaun, no relasaun entre país sira sei sai metin no fó benefísiu ba povu hotu.
Lembra negosiasaun ba delimitasaun fronteira marítima entre Timor-Leste no Indonézia iha ronda datoluk nian, durante loron tolu, entre 27 no 29 Abríl, iha Singapura, marka progresu ne’ebé signifikativu.
Tuir komunikadu Governu ne’ebé Tatoli asesa, negosiasaun ronda datoluk iha Singapura ne’e hanesan kontinuasaun husi enkontru primeira ronda ne’ebé hala’o iha Dili, iha Agostu 2025, no segunda ronda ne’ebé hala’o iha Jogjakarta, Indonézia, iha Dezembru 2025.
Primeiru-Ministru, Kay Rala Xanana Gusmão, ne’ebé akompaña direta ekipa negosiasaun Timor-Leste ne’e konsidera iha susesu boot, tanba parte rua loke-an, rona malu no konsege iha entendimentu ida hodi la’o tuir de’it Lei Direitu Internasionál Tasi nian.
Husi rezultadu negosiasaun ronda datoluk ne’e hotu-hotu konkorda katak, fulan-Agostu tinan 2026 ne‘e avansa ba ronda dahaat negosiasaun nian ne’ebé desididu atu hala‘o iha Bali-Indonézia.
Jornalista: Nelson de Sousa
Editór: Evaristo Soares Martins
