DILI, 08 Maiu 2026 (TATOLI)–Institute Of Bussiness (IOB) parseria ho Unidade Guangzhou Xina, realiza vídeo konferénsia durante loron-tolu, hahú 07 to’o 09 Maiu 2026, hodi partilla teknolojia informátika ba estudante Fakuldade rua hanesan Mekánika no Enjeñaria hodi hasae sira-nia koñesimentu no abilidade iha área teknolojia.
Dekanu Fakuldade Enjeñaria, Filomeno de Jesus, hateten, atividade ne’e realiza durante loron-tolu, ne’ebé temátika ne’ebé apreende la sees husi siénsia no teknolojia.
“Vídeo konferénsia ne’e bele ajuda estudante sira iha koñesimentu iha área enjeñaria nomós matemátika ninian, atividade ne’e halo kooperasaun entre nasaun rua no univesidade rua Guangzhou no IOB,” Dekanu hato’o ba Jornalista Ajénsia TATOLI iha ninia knaaar fatin, IOB Fomentu, Sesta ne’e.
Nia dehan, matéria sira ne’ebé painelista fó ba estudante sira mak utilizasaun eletrónika bázika no manutensaun sasán elektronika.
Kooperasaun entre parte rua ne’e la’o ona durante tinan-rua to’o tolu, no estudante husi IOB halo ona estudu komparativu iha Xina.
“Koperasaun ne’e ita la’o ona antes, ita haruka estudante sira bá eskola iha ne’ebá, koopersaun ita dehan katak númeru vídeo sira hanesan ne’e kona-ba formasaun ba língua xina ninian estudante liuhusi IOB tenke tuir formasaun sira hanesan nee,” nia akresenta.
Notísia relevante : IOB loke kompetisaun ba estudante ensinu sekundáriu dezenvolve talentu
Atividade ne’e partisipa husi estudante 40 husi Fakuldade Enjeñaria.
Dosente Fakuldade Enjeñaria IOB, Jeronimo dos Santos, hateten, durante atividade lsira sei partilla ba estudante sira kona-ba eletrónika, teknolojia utilizasaun motór no aplikasaun industriál.
“Eventu ida-ne’e akontese loron-tolu, horiseheik, ohin no aban, iha ne’e sira ko’alia liuliu kona-ba áea eletrónika teknolojia utilizadu ninian no utiliza motor, ne’ebé sira hakarak fahe sira-nia esperiénsia atu kontrolu ba motór no industriál ne’ebé aplika mai iha Timor oinsa mak sira utiliza esklasaun sira nee,” nia katak.
Aleinde ne’e, estudante sira apreende mós kona-ba instalasaun elétrika uma nian no bomba elétrika atu ajuda fornesimentu bee ba komunidade.
“Estudante sira husi IOB ba ohin sira ko’alia liu kona-ba oinsá instalasaun halo ligasaun ho elétrika uma nian, aban sira sei ko’alia kona-ba bomba elétrika ne’ebé ajuda atu suply bee oinsá bele oferese bee,” nia dehan.
Jerónimo konsidera atividade ne’e importante tanba ajuda motiva estudante sira apreende liuhusi prátika no simulasaun.
Iha fatin hanesan, Estudante Fakuldade Enjeñaria husi Departementu Eletrisidade Eletrónika IOB, Alexandro Romário dos Santos, konsidera atividade ne’e fó benefísiu hodi estudante sira apreende no aumenta koñesimentu,” nia katak.
Estudante ne’e husu ba universidade atu kontinua atividade hanesan atu estudante sira bele apreende liután.
“Ha’u husu ba Universidade, se bele karik kontinua bele halo mudansa títulu sira ne’ebé sira fó, tanba iha ne’e eskola STM mak barak SMA sira, se bele karik, ida-ne’e bele kontinua nafatin tanba formasaun sira hanesan ne’e la’ós timoroan sira mak fó, ne’e Xina sira bele karik sira bele fó liu tan formasaun sira hanesan ne’e atu nune’e ami bele apreende di’ak liután,” Jerónimo katak.
Jornalista : Natalino Costa
Editora : Julia Chatarina
