OEKUSI, 11 Maiu 2026 (TATOLI) – Ministériu Administrasaun Estatál (MAE), segunda ohin divulga informasaun kona-ba definisaun kompeténsia, kompozisaun direitu, devér organizasaun no funsionamentu atu estabelese Orgaun Konsellu-Konsultivu Rejionál iha Rejiaun Administrativa Espesiál Oekusi Ambeno (RAEOA).
Diretór Jerál Desentralizasaun no Governu Lokál husi MAE, António Guterres, informa, divulgasaun ne’e importante atu hasa’e koñesimentu ba Autoridade RAEOA no administradór postu administrativu sira, kona-ba kna’ar no kompeténsia orgaun Konsellu-Konsultivu iha Oekusi.
“Ami mai ho ekipa ida atu fasilita no apoia, liuhusi divulga informasaun ba estabelesimentu orgaun Konsellu-Konsultivu rejionál, bele harii husi Prezidente Autorudade komposta husi entidade mai husi Diresaun Administrasaun RAEOA nian, atu fó apoia serbisu Autoridade nian, tanba orgaun ne’e bele fó apoia koordena, komunika no rekomenda liuhusi enkontru Konsellu-Konsultivu rejionál, tanba iha tempu-badak sei harii husi Prezidente Autoridade no sei hetan tomada pose, atu nia funsionamentu ba oin bele la’o hanesan mós iha munisipíu seluk,” nia hateten ba iha salaun administrasaun Numbei, ohin.
Notísia relevante:RAEOA sei estabelese Konsellu-Konsultivu atu reforsa polítika Prezidente Autoridade
Nia esplika, definisaun Konsellu-Konsultivu bazea dekretu-lei númeru 1/2026, prevista iha artigu 14, katak Konsellu Konsultivu mak órgaun konsultativu Autoridade mak Prezidente RAEOA.
Ho nia misaun, bazeia diploma ministeriál 51/2016, prevista iha artigu 3, atu promove partisipasaun ajente sosiál no forsa ativa lokál iha prosesu formulasaun, diskusaun no ezekusaun instrumentu planeamentu estratéjiku autoridade munisipál no akompaña no avalia prestasaun bens no serbisu públiku autoridade rejionál ba sidadaun sira.
“Kompozisaun ne’e sei nomea husi Prezidente Autoridade RAEOA, ami husi nasionál liuliu Ministériu Administrasaun Estatál, mai apoia no fasilita de’it, esplika kona-ba sira-nia kna’ar no kompeténsia bazea baze legál sira,” nia hateten.
Notísia relevante:Rogério Lobato sei harii konsellu konsultivu hodi mellora prestasaun servisu
Prezidente Autoridade RAEOA, Régio da Cruz Salu, prefere tenke estabelese Konsellu-Konsultivu Rejionál, bazea orientasaun serbisu tuir dekretu-lei númeru 1/2026 nu’udar alterasaun estatutu RAEOA nian.
“Ohin ita ko’alia ba matadalan atu estabelese ho kompozisaun no funsionamentu sekretáriadu nia kna’ar hotu kompletu ne’e premeira-ves tanba hatuur kedas iha dokumentasaun, ne’ebé iha la’o tuir de’it, tanba formatu sira mós ita iha ona, ne’ebé ohin ita hetan ona, aban ba oin ita sei halo nomeasaun formal,” nia dehan.
Entretantu, kompozisaun Orgaun Konsellu Konsultivu Rejionál ne’e, bazeia dekretu-lei 1/2026 artigu 16, membru Konsellu Konsultivu kompostu hosi, Prezidente Autoridade RAEOA, Sekretáriu Rejionál na’in-tolu.
Reprezentante xefe suku, reprezentante na’in rua husi veteranu, reprezentante na’in rua hosi setór privadu, reprezentante na’in rua hosi intelektuál, reprezentante na’in rua husi juventude, reprezentante na’in rua hosi konfisaun relijioza sira, reprezentante feto na’in rua husi organizasaun ne’ebé promove igualdade jéneru, reprezentante ida husi kada partidu polítiku neʼebé hetan asentu iha Parlamentu Nasionál, lia-na’in ida, reprezentante ida hosi Komisáun Funsaun Públika (KFP).
Jornalista: Abílio Elo Nini
Editór: Rafael Ximenes de A. Belo
