BAUKAU, 12 Maiu 2026 (TATOLI)—Vítima insiál DB idade 61 ho kondisaun lanu lakon vida bainhira asaltu alin rasik ho insiál NL iha área Bubuloma, Suku Saelari, Postu Administrativu, Munisípiu Baukau.
Tuir kronolojia, kazu referidu akontese iha loron Sábadu, 09 Maiu, purvolta meiudia 02:00 iha-ne’ebé vítima DB nu’udár alin ho kondisaun lanu espontaniamente halo asaltu ba NL nu’udár maun rasik ho dima maibé maun halo defeza lori ai hodi baku datoluk iha ulun hodi rezulta vítima mate fatin.
“Nia indikasaun, alin ne’e beibeik ona lanu ba halo problema ho nia maun ne’ebé kondisaun Ema ho Defisiénsia (EhD) nune’e defende an baku mate nia alin,” Komandante Polísia Munisípiu Baukau, Superintendente João Sancho Pires hateten iha nia kna’ar fatin, Vila Nova Baukau, Tersa ne’e.
Superintendente Pires relata arguidu NL deside halo kontaktu no aprezenta an ba autoridade suku no halo kontaktu ho Eskuadra Polísia Postu Laga nune’e Komandu PNTL Munisípiu liuhusi Seksaun Investigasaun Kriminal to’o kedas fatin akontesimentu hodi rekolla informasaun hamutuk evidénsia hanesan dima no ai inklui mós koordena família kona-ba autopsia, mesmu família deside halot tuir lisan no kulturál.
“Ohin ita entrega ona ba Ministeriu Publiku, tanba kazu ne’e fraglante delitu no suspeitu detein hela iha sela Baukau para kontinua ba prosesu,” Pires akresenta.
Entretantu, Komandu PNTL Munisípiu Baukau liuhusi Servisu Investigasaun kriminál aprezenta ona kazu referida hamutuk ho evidénsia sira ba Ministériu Públiku atu prosesa iha Tribunál ho numéru Nuc 0048/26 BCSIC.
Jornalista: Natalino Belo
Editór: Xisto Freitas da Piedade
