DÍLI, 12 maiu 2026 (TATOLI) — Ministériu Obras Públikas (MOP), liuhosi Sekretáriu Estadu Eletrisidade, Bee no Saneamentu, sei kontinua distribui painel solár ba komunidade sira-ne’ebé hela iha área remota, liuliu zona foho ne’ebé seidauk iha asesu ba rede eletrisidade nasionál.
Deklarasaun ne’e hato’o hosi Ministru Obras Públikas, Samuel Marçal, durante eventu asinatura kontratu entre governu ho kompania ba pakote 51, relasiona ho instalasaun eletrisidade ba aldeia 141 iha teritóriu nasionál.
Ministru explika katak, Governu sei asegura fornesementu eletrisidade ba povu tomak, maibe la signifika katak povu hotu-hotu bele hetan asesu diretamente ba rede eletrisidade nasionál, tanba realidade jeográfika ne’ebé mak la hanesan. Tanba ne’e mak komunidade ne’ebé hela iha área inasesivél sira bele simu de’it painel solár.
Ni deahn painel solár ne’e sei fahe ba populasaun sira hela iha foho leten ne’ebé estrada seidauk tama liuliu ba komunidade ne’ebé menus husi uma kain 10. “Maski sira hela dook ba malu, painel solár sei fahe ba sira hodi hetan naroman,” dehan Samuel Marçal.
Nia subliña katak distribuisaun painel solár ne’e la’os diskriminasaun, maibé solusaun prátika bazeia ba kondisaun lokál, ho prioridade ba komunidade sira ne’ebé difisil atu asesu ba rede eletrisidade.
Ministru afirma katak programa painel solár sei kontinua implementa iha munisípiu hotu-hotu, inklui RAEOA no Atauro.
Jornalista: Camilio de Sousa
Editor: Filomeno Martins
