Komunidade Raiheu mobiliza malu hodi hadi’a estrada liga bá Hali-Mesak
BOBONARU, 08 Maiu 2026 (TATOLI) – Líder komunitáriu hamutuk ho komunidade hola insiativa hodi hadi’ak estrada husi suku Raiheu, postu administrativu Kailaku, ba área Hali-Mesak, suku Odomau, postu Maliana, munisípiu Bobonaru, ne’ebé hetan danus kauza husi dezastre naturál foin lala’is ne’e.
Xefe suku Raiheu, Ventura Maria Tai, dehan populasaun sira serbisu ho voluntária tanba to’o agora Institutu Jestaun Ekipamentu no Apoia Dezenvolvimentu Infraestrutura (IGEADI) Brigada Maria Tapó seidauk responde pedidu ba normalizasaun estrada.
“Pedidu ita hatama dezde Fevreiru ne’e, depois Prezidente IGEADI hatún ona depaxsu ba Brigada Maria Tapó no ami konfirma ho sira dehan sei okupadu hela serbisu. Ne’e mak ami konsellu suku deside hadi’ak neineik”, nia dehan ba Tatoli, iha Malianan, sesta ne’e.
Notísia relevante: Estrada a’at, obrigada idozus sira iha Raiheu la’o ain ba simu subsidiu
Ventura subliña katak konsellu suku Raiheu hola insitiva ne’e atu fasilita movimentasaun ema, liuliu ba atividade ekonómika no sosiál.
Xefe suku ne’e salienta katak daudaun transporte karreta labele asesu bá suku Raiheu no situasaun ne’e difikulta ekipa teknika kompañia Vorakai no Ministeriu Transporte no Telekomunikasaun atu halo instalsaun ba rede internét Starlink iha sede suku.
“Komunidade moras emerjésia, inan-isin rua atu partu, ami hasoru problema maka’as tanba hulan de’it, balu to’o bebe lakon vida. Depois nesesidade bazika mós susar tebes. Agora foos saku ida ne’e folin sira sosa iha Maliana $12, mai fa’an $14 to’o $15 tanba aluga ojek de’it”, nia dehan.
Membru komunidade, Carmelita Gonçalves, reforsa katak estrada iha pontu balun presiza intervensaun husi IGEADI, tanba kotu totál no iha de’it espasu ba motorizada atu liu.
“Se ida-ne’e mak sira la mai, PNDS tinan 2026 iha ami nia suku labele la’o tanba dalan kotu, rai-monu depois fatuk boot-boot de’it. Ita hasai ho liman labele ida”, nia relasa.
Estada liga husi suku Raiheu bá to’o área Loribia, aldeia Maganutu, suku Ritabou, to’o Hali-mesak ne’e ho totál distánsia kilómetru 15 no dalan ne’e liga mós ba aldeia rua iha suku Atudara no Meligo.
Servisu komunitáru ne’e hetan apoiu foos saku 12 husi Diresaun Servisu Munisipál Asaun Sosiál hodi prepara ba konsumu komunidade.
Notísia relevante: Estrada kotu difikulta kompañia aselera projetu eletrifikasaun iha Raiheu
Jornalista: Sergio da Cruz
Editora: Maria Auxiliadora
