DÍLI, 12 Maiu 2026 (TATOLI) — Governu, liuhosi Empreza Públika Eletrisidade Timor-Leste (EDTL, E.P.), realiza asinatura kontratu ho kompania parseira 51 atu implementa projetu eletrifikasaun ba aldeia 141 iha teritóriu nasionál.
Atividade ne’e marka pasu importante hodi garante asesu eletrisidade ba povu tomak iha rai-laran.
Kontratu ba projetu distribuisaun liña eletrisidade ne’e asina hosi Prezidente Komisaun Eletrisidade EDTL, E.P., Paulo da Silva, no reprezentante husi kompania 51, iha Salaun Katedral, Díli, Tersa-feira (12/05).
Marka prezensa iha eventu ne’e inklui Primeiru-Ministru Xanana Gusmão, Ministru Obras Públikas, Samuel Marçal, no Sekretáriu Estadu Eletrisidade, Bee no Saneamentu, Santos Noronha.
“Hamutuk ita kontinua dezenvolve setor enerjia hodi fó naroman ba komunidade sira iha Timor-Leste,” dehan Ministru Samuel Marçal.
Nia relata katak aldeia 186 mak seidauk iha asesu ba eletrisidade, no pakote 51 ne’e sei responde de’it ba aldeia 141 iha 2026.
Ministru ne’e hatutan katak Governu, liuhosi Sekretaria Estadu Eletrisidade, Bee no Saneamentu, dadaun ne’e kontinua hela prosesu tenderizasaun ba etapa tuir mai hodi fornese eletrisidade ba aldeia ne’ebé mak seidauk hetan naroman.
“Tempu tuir mai, ita sei asina tan pakote seluk hodi lori naroman ba aldeia hotu iha teritóriu nasionál,” nia hateten.
Iha fatin hanesan, diretór kompania Nivedral Unip, Lda., Olonio Germano Alves, nu’udar benefisiáriu kontratu eletrifikasaun husi Munisípiu Ermera, suku Hatulia Vila, hateten katak nia kompania komprometidu atu kumpre kontratu ne’ebé asina.
“Hau asina kontratu ho durasaun fulan 10 atu instala eletrisidade ba komunidade iha Hatulia Vila. Ami sei esforsu atu finaliza servisu ne’e iha fulan 6 to’o 8 nia laran,” nia hateten.
Primeiru-Ministru Xanana Gusmão husu ba kompania sira atu serbisu ho responsabilidade no profisionalizmu tuir kontratu ne’ebé asina.
Nia sublña katak kompania sira tenke servisu ho di’ak, “evita lista-negra”, hodi kontinua mantein fiar husi Governu iha futuru.
Projetu 51 ne’e finansia husi Orsamentu Jerál Estadu 2026 ho montante US$11,3 miliaun.
Kompania sira hetan kontratu ho valor osan la hanesan, balun ho US$300.000 no projetu balun nia valor aas liu, depende ba distánsia no lokalizasaun.
Durasaun implementasaun projetu varia entre fulan 6 to’o 10. Governu espera katak projetu hotu sei remata iha tinan ida ne’e nia rohan ka inísiu 2027, hodi fó naroman ba komunidade sira iha nasaun tomak.
Jornalista: Camilio de Sousa
Editor: Filomeno Martins
