BOBONARU, 13 Maiu 2026 (TATOLI)-Iha trimestre dahuluk tinan 2026, Sentru Saúde Komunitáriu Maliana, munisípiu Bobonaru, rejista pasiente 3.738 sofre Infesaun Respiratória Aguda (IRA).
Xefe Sentru Saúde Komunitáriu Maliana, Nascimento Mau Leto, dehan kazu IRA rejista aas mak diarreita 613, isin-katar 189 no moras seluk la ho diagnóstika 5.962.
Mau Letto haktuir katak dadus ne’e rejista hafoin pasiente sira halo tratamentu iha sentru saúde nomós bainhira ekipa saúde halo atividade iha suku no aldeia.
Notísia relevante: SSK Maliana rejista ema 1,628 sofre moras IRA
“Ami iha rekursu ne’ebé sufisiente atu atende komunidade sira iha sentru saúde no aldeia sira ne’ebé dook husi instalasaun saúde”, Mau Leto dehan iha Ritabou, ohin.
Atu prevene moras IRA, Sentru Saúde Komunitária Maliana halo ona sosializasaun no promosaun saúde iha nivel suku no aldeia kada fulan ho tópiku ne’ebé la hanesan.
Dirijente ne’e afirma katak moras IRA afeta ba ema ho idade adultu no barak liu labarik ki’ik, tanba sira-nia imunidade sei fraka no seidauk iha koñesimentu atu halo prevensaun rasik.
“Husu família sira iha uma-laran dalaruma fo’er barak, rai-rahun barak, tenke hamoos depois uza máskara iha viajen, depois ISPA ne’e liuhusi vírus ruma”, dehan.
Iha trimestre dahuluk ne’e, SSK Maliana mós halo vasinasaun ba antirrábika ba pasiente na’in-383.
“Seidauk iha ema ida hetan pozitivu raiva. Agora vasina sufisiente hela, loroloron ami sempre vasina riava nian”, dehan.
Lembra katak, iha 2025, Sentru Saúde Maliana rejista kazu IRA totál 6.969 .
Notísia relevante: SSK Maliana rejista kazu Dengue iha suku haat
Jornalista: Sergio da Cruz
Editora: Maria Auxiliadora
