DILI, 13 Maiu 2026 (TATOLI)—Ministériu Juventude Desportu Arte no Kultura (MJDAK) liuhusi Komisaun Nasionál Desportu (KND) realiza formasaun espesializada Antí-Doping ba atleta Taekwondo na’in-11.
Atividade ne’e hanesan preparasaun ba kampionatu internasionál ne’ebé sei hala’o iha Mongólia no kualifikasaun ba Asian Games iha Japaun.
Diretór Ezekutivu Komisaun Nasionál Desportu (KND), João M. Rodrigues, hateten formasaun ne’e importante tebes ba atleta hirak ne’ebé atu aranka ba partisipa eventu iha Mongólia no prepara ba Asian Games 2026 iha Japaun.
“Ita-nia objetivu mak atu fó hanoin ba treinadór no atleta sira hodi labele uza substánsia ne’ebé bandu hodi hasa’e forsa fíziku. Ita presiza asegura integridade desportiva iha nível hotu-hotu,” João hateten iha nia intervensaun iha Salaun Magna MJDAK, Lesidere, kuarta ne’e.
Nia dehan, Governu nafatin fasilita atleta sira no fahe informasaun oinsá labele monu ba risku ne’ebé bele estraga atleta no nasaun.
“Akompaña no apoia ita-nia erói desportu sira hodi lori vitória no dignidade ba rai doben Timor-Leste,” nia dehan.
Formasaun uza plataforma mundiál ADEL, hodi garante atleta sira kumpre regra Antí-Doping Rule Violations (ADRVs) ne’ebé rekoñese iha nível globál.
Kampionatu iha Mongólia nu’udar kualifikasaun ba 20th Asian Summer Games 2026 iha Nagoya, Japaun. Atleta ne’ebé termina iha pozisaun na’in-hitu (7) ba leten sei hetan kedas fatin kualifikasaun.
Atleta na’in-neen (6) sei aranka ba Ulaanbaatar, Mongólia, iha loron 18 Maiu ne’e hodi kompete iha kategoria Poomsae no Kyorugi.
Formasaun ne’e fó kuñesimentu kle’an ba atleta no treinadór sira kona-ba direitu, responsabilidade no perigu husi substánsia proibidu.
Jornalista : Hortencio Sanchez
Editór : Cancio Ximenes
