BOBONARU, 14 Maiu 2026 (TATOLI) – Prezidente Autoridade Munisípiu Bobonaru, Paulo Moniz Maia, hamutuk ho komitiva halo observasaun ba infraestrutura Ensinu Báziku Sentrál (EBC) númeru 1 Maliana ne’ebé aat.
Durante vizita ne’e, PAM Bobonaru identifika katak kondisaun uma-kakuluk, plafón, simentu no kuadru hakerek barak mak la di’ak no balun lahuk tiha ona.
Haree ba problema ne’e, nia parte sei orienta Diretór Ajénsia Planeamentu no Diretór Servisu Munisipál Edukasaun atu koordena malu hodi tau iha planu prioridade ba tinan 2027, liuhusi projetu Planu Integradu Dezenvolvimentu Munisipál (PDIM) ou Projetu Konstrusaun Infraestrutura Edukativa husi Ministériu Edukasaun.
Notísia relevante: EPE Oe-leu tama lista prioridade ba konsturusaun iha 2027
“Eskola ida-ne’e sentru no antigu ona. Atu halo manutensaun ka reabilitasaun, Edukasaun ho Estatál tenke komunika malu. Se Estatál tau planu, Edukasaun mós tau planu, entaun planu rua ne’e bele aprova hotu no bele mós sumba hotu. Ne’ebé ha’u sei fó hatene ba diretór edukasaun atu tau prioridade ba 2027 nian”, nia hateten durante konversa ho Diretór EBC Malina, José Moniz Barreto.
Diretór eskola agradese no fiar katak Autoridade Munisípiu Bobonaru no Governu sentrál sei tau prioridade hodi rezolve.
“Ami labele rezolve tanba orsamentu konsensaun eskolár la to’o, tanba ne’e sala sia kedas, Edukasaun mai haree ona, maibé ami lahatene”, nia dehan.
Totál estudante EBC Maliana tinan letivu 2026 hamutuk 1.017, agrupa ho Ensinu Báziku Filiál Odomau no Holsa hamutuk 2.000-resin.
Notísia relevante: Governu hatuur fatuk dahuluk ba konstrusaun eskola foun 82
Jornalista: Sergio da Cruz
Editora: Maria Auxiliadora
