DILI, 07 Maiu 2026 (TATOLI) – Ministériu Agrikultura, Pekuária, Peska, no Floresta (MAPPF) planeia, iha tinan ne’e, sosa fini ronelada rihun 180, iha ne’ebé hare kulit tonelada rihun 150 no batar rihun 130 ho totál orsamentu rihun $600-resin.
Diretór Nasionál Agrikultura, Ortikultura no Protesaun Planta, Lúcio Nuno, esplika fini sira ne’e hola iha rai-laran de’it ne’ebé prodús husi Asosiasaun Fini 65 iha munisípiu sira, inklui Oekusi.
“Prosesu agora iha ona aprovizionamentu, kompañia sira kompete, ida ne’ebé manán sei sosa”, Lúcio Nuno hateten ba Tatoli, ohin.
Nia salienta katak bainhira empreza manán-na’in sira sosa tiha fini husi Asosiasaun Produsaun Fini, rai iha Diresaun Servisu Agrikultura Munisipál sira no sira mak sei distribui ba to’os-na’in ka agrikultór sira.
Distribuisaun fini nu’udar programa ministériu nian atu apoia agrikultór sira hodi hasa’e produsaun iha rai-laran, liuliu tanba mudansa klimátika ne’ebé udan tau la tuir nia tempu.
“Ita-nia serbisu mak distribui fini, maibé rezultadu ne’e atu fa’an ka han ne’e depende ba agrikultór sira. Dalabarak agrikultór sira prodús, Governu liuhusi Sentru Lojístika Nasionál mak sosa tau iha armazein”, nia dehan.
Tuir nia, fini ne’ebé kada tinan distribui ba agrikultór sira no nia rezultadu depende ba tempu tanba ho mudansa klimátika ne’ebé akontese.
Iha 2025, ministériu sosa fini hare kulit no batar hamutuk tonelada 330, ne’ebé fahe ba agrikultór sira kuda. Fini hare kuda iha natar ektare 37.691 no rezultadu produsaun hamutuk tonelada 158.300, no konverte ba foos tonelada 94.982. Ba fini batar kuda iha to’o ektare 35.022,35, rezultadu produsaun tonelada 102.795,89.
Jornalista: Arminda Fonseca
Editora: Maria Auxiliadora
