BAUKAU, 14 Maiu 2026 (TATOLI)—Tribunál Primeira Instánsia (TPI) Munisípiu Baukau aplika prizaun preventiva ba arguidu hamutuk na’in-tolu relasiona ho envolvimentu iha kazu omesídiu iha Aldeia Poros, Suku Mehara, Postu Administrativu Tutuala, Munisípiu Lautein.
Kazu referida akontese iha loron Domingu (10/05/2026) bainhira arguidu no vítima partisipa serimónia festa koremetan iha-ne’ebé mosu konfrontu entre grupu joven hodi rezulta vítima Vinsensio de Jesus (21) lakon vida no na’in-tolu seluk kanek.
Notísia relevante: Membru F-FDTL suspeitadu ba kazu omisídiu iha Poros kumpre prizaun preventiva
“Remete mai Tribunál informasaun ba Ministériu Públiku nian hetan suspeitu na’in-tolu forte tebetebes envolve direta iha asaun ne’e,” Defensór Públiku, José Delima hateten iha Tribunál Primeira Instánsia Baukau, Vila Nova, Kinta ne’e.
Delima relata prosesu julgamentu primeiru interrogatóriu ba kazu referidu hala’o iha loron Tersa-kuarta (12-13 Maiu 2026) nune’e TPI Baukau aplika medida prizaun preventiva ba arguidu na’in-tolu ho inisiál LRH, GdSB no MdS bazeia ba akuzasaun ho krime tolu ne’ebé prevista iha Kódigu Prosesu Penál (KPP) artigu 139 kona-ba omesídiu agravadu, artigu 145 kona-ba ofensa integridade simples no artigu 258 kona-ba danu simples.
Enkuantu, suspeitu na’in-hitu seluk hanesan na’in-rua aplika Termu Identidade Rezidénsia (TIR) no na’in-lima seluk aplika medida koasaun aprezentasaun periódika.
“Tuir informasaun katak sira na’in-tolu lori sai vítima husi tenda laran ba li’ur baku lisuk hanesan ne’e,” Delima haktuir.
Entretantu, kazu omesídiu referidu rejista iha Tribunál Primeira Instánsia Baukau ho 0028/26.LASIK ne’ebé prezide husi Juíza Singulár, Maria Modesta Vieira, Ministériu Públiku reprezenta husi Osório de Jesus no arguidu sira hetan defeza husi Defensór Públiku, José Delima.
Jornalista: Natalino Belo
Editór: Xisto Freitas da Piedade
