DILI, 15 Maiu 2026 (TATOLI)-Prokuradór-Jerál Repúblika (PJR), Nelson de Carvalho, informa katak progresu investigasaun ba kazu ró Haksolok atinje ona 80%.
“Dalabarak ona ita-boot sira husu kona-ba kazu ró Haksolok. Prosesu ne’e la’o hela, kazu ne’e iha kompleksidade. Ita bele dehan agora [progresu investigasaun] iha 80%”, nia responde ba jornalista Tatoli, iha Parlamentu Nasionál, ohin.
Nelson de Carvalho rekoñese katak kazu ró Haksolok ne’e nia prosesu kompleksu tebes, tanba ne’e demora uitoan, maibé investigasaun kontinua la’o. Depoizde simu pose, Prokuradór-Jerál ne’e kria kedas ekipa ida ne’ebé agora hala’o hela serbisu ida-ne’e.
Antes ne’e, nia hateten Ministé riu Públiku (MP) konstitui ona ema hamutuk na’in-50-resin ba kazu ró Haksolok.
Ró Haksolok sosa ho kustu millaun €13,7, inaugura iha loron 26 Maiu 2017, iha sidade Figueira da Foz, Portugál, no tuir informasaun ró ne’e atu to’o Timor-Leste iha Outubru 2017, maibé tanba problema internál husi empreza Atlantic Eagle Ship Building ho subkontratór maka ró ne’e ladauk mai.
Ró ne’e rasik iha kapasidade atu tula ema na’in-377 no karreta hamutuk 15.
Prosesu kontrusaun ró Haksolok ninia kontratu asina iha tinan 2014 entre Governu no empreza portugeza. Konstrusaun ró ne’e konsege paradu, maibé bainhira estabelese Zona Espesiál Ekonomia Sosiál Merkadu (ZEESM), prosesu kontrusaun ró-ahi ne’e entrega ba autoridade mak responsabiliza.
Desizaun atu hili ninia estaleiru (fatin atu harii ró) hahú no foti husi V Governu Konstitusionál, ne’ebé selebra kontratu ho empreza Atlantic Eagle Ship Building Lda., (Atlanticeagle) iha loron 22 Setembru 2014.
Rejiaun Administrativa Espesiál Oekuse Ambenu (RAEOA) simu prosesu konstrusaun ró, liuhusi transferénsia projetu no alokasaun orsamentu husi Governu Timor-Leste.
Parlamentu Nasionál (PN), liuhusi Komisaun C ne’ebé responsavel ba Asuntu Finansa Públika halo vizita bá Portugál iha Jullu tinan kotuk hodi haree direta kondisaun ró Haksolok no halo mós fiskalizasaun ba ró ne’ebé to’o agora seidauk to’o Timor-Leste.
Antes ne’e, Komisaun C alerta ba MP atu tau atensaun séria ba kazu ró Haksolok tanba bainhira membru Komisaun halo vizita traballu iha loron 25 Jullu 2025 liubá iha fatin estalleiru Atlantic Eagle, iha Portugál, nota katak iha irregularidade barak.
Tuir Komisaun C nia relatóriu fiskalizasaun, antes ne’e Parlamentu aprova orsamentu millaun $17 hodi aloka ba konstrusaun ró ne’e, tuir fali millaun $14 no ikus kuaze millaun $4.
Notísia relevante: MP konstitui ona ema na’in-50 resin sai arguidu ba kazu Ró Haksolok
Jornalista: Nelson de Sousa
Editora: Maria Auxiliadora
