OEKUSI, 15 Maiu 2026 (TATOLI) – Rejiaun Administrativa Espesiál Oekusi Ambenu (RAEOA) rejiaun “espesiál” ba Timor-Leste, maibé dezafiu ida ba Antánia Tani – inan ho defisiénsia fízíka. Iha Aldeia Oéfoko, Suku Bobokase, Antánia ho nia família tenke luta hasoru anin no udan iha uma provizória ne’ebé nia kakuluk no didin taka ho zinku ka kalen feruzen, ku’ak no nakloke – anin no loromatan, huu no leno borus ho liberdade.
Iha uma zinku simples ne’e nia mahon, maske kbiit fíziku limitadu no tenke depende ba kadeira roda, Antánia la rende ba dezafiu ka sasidik moris ne’e lorloron iha rai-ketan. Nia harii grupu sorru Tais hamutuk ho feto na’in-15 seluk hodi buka osan ba sustenta moris. Ho lian ne’ebé nakdedar maibé nakonu ho kbiit, nia haktuir:
“Ha’u maske la’o di’ak, iha kursi roda (kadeira roda) de’it. Maibé, ha’u tenke halo Tais hodi fa’an atu buka osan hodi atende uma-laran no apoia oan sira ba eskola.”
Ba inan Antánia ne’ebé ho kondisaun defisiénsia, oan sira mak motivasaun boot liu maske ekonomia família nian kbiit-laek.
“Ha’u maske defisiénsia maibé ha’u tenke iha oan nu’udar ha’u-nia jerasaun. Maibé, ha’u ho ha’u-nia serbisu mak halo Tais, no ha’u kaben idade ona maibé tenke halo to’os. Ne’ebé, ami laiha osan barak atu halo uma di’ak, importante han hemu iha para ami moris ho ha’u-nia oan sira,” nia hatutan ho jenuína.
Vizita husi Governu: Naroman foun iha Oéfoko
Kondisaun ne’ebé ‘fura’ fuan ne’e ikusmai dada duni atensaun husi Vise-Ministra Solidariedade Sosiál no Inkluzaun (MSSI), Ceo Brites. Iha sesta ne’e, governante ne’e, ofisialmente, hakat rasik to’o Aldeia Oéfoko hodi haree ho matan no rona ho tilun luta ne’ebé ho defisiénsia, Antánia enfrenta.
“Ha’u rasik haree ona señora ne’e nia uma. Nia kondisaun ladi’ak tebes, ema na’in-haat iha de’it kuartu ida, dapur no haris-fatin mós laiha laran… entaun ida-ne’e ita tenke hadi’a,” Vise-Ministra MSSI dehan.
Promesa ba Mudansa
Iha vizita ne’e mós, Vise-Ministra Solidariedade Sosiál no Inkluzaun (MSSI) Ceo Brites, rekoñese, no kompromete sei apoia tuir kbiit ne’ebé Governu iha, maibé sei orienta ekipa ida hodi halo avaliasaun uluk molok fó apoiu.
“Ita tenke simu lai sira-nia proposta. Ita haree envolve osan hira, tanba MSSI mós iha programa apoia pontuál fó dalan atu apoiu liliu sidadaun sira ho defisiénsia,” Governante ne’e salienta.
Entretantu, ba Antánia Tani, promesa ne’e la’ós de’it konstrusaun semente no besi, maibé ne’e mak resposta ba ninia orasaun durante tinan-lima nia laran. Iha Oekusi ne’ebé dezenvolve hela, Antánia hein de’it katak loron ida, nia ho nia oan sira bele toba ho hakmatek maske udan tau maka’as iha li’ur.
Jornalista: Abílio Elo Nini
Editór: Rafael Ximenes de A. Belo
