OEKUSI, 04 Maiu 2026 (TATOLI) – Komandante Polísia Nasionál Timor-Leste (PNTL) Rejiaun Administrativa Espesiál Oekusi Ambeno (RAEOA), Superentendente Xefe Polísia, Nicolau Francelino da Costa, informa, daudaun ne’e rejista motorizada ida lakon iha bairru Masin aldeia Sanane suku Costa sub-rejiaun Pante Makasar.
Kronolojia akontesimentu lakon iha loron Sábadu madrugada 02 Maiu 2026 kuaze tuku 03:00 dadersan, motorizada ho koor metan tipu Revo Fit karboratór ho xapa matrikula, OE.4160 ne’ebé para hela iha uma oin.
“Ida-ne’e atensaun ba ita hotu, tanba ita foin rejista dahuluk kazu hanesan ne’e iha Oekusi, tinan barak ita nunka rejista, tan ne’e Komandu PNTL Oekusi sei tenta halo planu oinsá kontrola másimu, atu identifika ba autór ne’ebé prátika atitude ne’e,” nia hateten iha Komandu PNTL Oekusi, ohin.
Nia afirma, informasaun ne’ebé motorizada lakon, komandu PNTL partilla tutan ona ba iha seksaun tránzitu rodoviária atu halo pasa-revista ba transporte públiku sira liliu motorizada.
“Sei ita hetan motorizada ne’ebé lakon, sei halo investigasaun no loke prosesu ba autór ho rigorozu, ne’ebé husu ba públiku atu ajuda mós serbisu polísia, kaer identifika ema ruma deskonfia katak, nia mak autór, bele informa ba PNTL atu halo investigasaun klean,” nia hateten.
Notísia relevante:Kazu na’ok motorizada, PNTL Bobonaro detein suspeitu na’in-rua
Elizabet Ulan, nu’udar motorizada-na’in, informa, motorizada ne’ebé lakon ho dokumentu kompletu, no iha naran dokumentu ne’e uza nia la’en nia naran, Domingos Caet, nu’udar badaen.
“Motor para ne’e lima kedas, maibé foti lós ami-nian, no kalan ne’e, ami iha ne’e hotu maibé kala ami toba ona, tanba tuku 12:00 ami sei tuur hela, kala foti iha tuku 02 ba tuku 03:00 hanesan ne’e, aban dadersan ha’u-nia katuas oan buka ona atu ba serbisu, haree ba laiha, ne’e mak husu fahe informasaun maibé laiha, to’o ohin loron tolu ona, ne’e mak ami informa ba polísia husu ajuda,”
Jornalista: Abílio Elo Nini
Editór: Rafael Ximenes de A. Belo
