DILI, 20 Maiu 2026 (TATOLI)—Vise Primeiru-Ministru no Ministru Defeza Austrália, Richard Marles, akompaña husi Enviado Espesiál ba Asuntu Defeza, Veteranu no Norte Austrália, Luke Gosling MP vizita Timor- Leste ohin hodi reprezenta Australia iha aniversáriu Restaurasaun Independénsia ba dala-24 iha Tasi tolu.
Prezensa ne’e ho sentidu katak Austrália no Timor-Leste hanesan nasaun viziñu no parseiru sira ne’ebé besik ho istória ne’ebé fahe no ligasaun forte entre ita-nia povu no komunidade veteranu sira, tamba ita-nia relasaun ne’ebé dura mak harii iha kooperasaun ba tinan barak hodi apoia ba estabilidade rejionál.
Vise Primeiru-Ministru no Ministru Defeza Austrália, Richard Marles, sente onra tebes mai vizita Timor-Leste iha aniversáriu restaurasaun independénsia ba dala-24.
“Ha’u hein atu hasoru malu ho Prezidente Ramos-Horta, Primeiru-Ministru Gusmão no Ministru Pedro Klamar Fuik hodi diskute kona-ba interese sira ne’ebé ita fahe hamutuk,” Governante ne’e hateten liuhusi iha nota ne’ebé Agência Tatoli asesu iha portál Embaixada Austrália, ohin.
Nia dehan, Austrália iha parseria defeza ida-ne’ebé dura ho Timor-Leste, bazeia ba interese no benefisiu neʼebé mútuo. Austrália sei kontinua hamriik hamutuk ho Timor-Leste hanesan parseiru besik iha defeza no seguransa.
Enkuantu durante nia prezensa iha Dili, nia sei hasoru malu ho Prezidente Timor-Leste, José Ramos-Horta, Primeiru-Ministru, Kay Rala Xanana Gusmão no Ministru Defeza, Donaciano do Rosário Costa Gomes Pedro Klamar Fuik.
Iha enkontru ne’e sira sei ko’alia kona-ba oportunidade atu hametin ita-nia parseria defeza no seguransa hanesan esplika ona iha Parseria Foun ba Era Foun (New Partnership for a New era),
Tanba iha tinan 2026 ne’ebé estabelese husi Primeiru-Ministru Albanese no Primeiru-Ministru Gusmão iha fulan Janeiru no identifika dalan sira atu hasa’e ita-nia parseria ba tinan oin. Ida ne’e inklui servisu hamutuk iha Enkontru Ministru Defeza ASEAN nian (sigla Inglés ADMM-Plus) no iha ninia Grupu Traballu Espesialista sira, hafoin Timor-Leste adezaun ba ASEAN iha tinan 2025.
TATOLI
