BAUKAU, 20 Maiu 2026 (TATOLI)—Administradór Postu Administrativu Kelikai Antiga, Francisco Matias Gusmão, solisita líder nasionál sira atu sai ezemplár hanesan hamutuk hametin unidade hodi jerasaun foun banati tuir.
Francisco Gusmão konsidera Timor-Leste restaura ona independénsia ba da-XXIV nune’e reflesaun importante mak presiza unidade entre líder nasionál tanba sai barómetru ba dezenvolvimentu Timor-Leste iha-ne’ebé antes ne’e hatudu ona bainhira hamutuk luta ba libertasaun nasionál.
“Agora tinan 24 ona, líder nasionál sira tempu ona atu tula-dikur no fó-liman ba malu tau forsa hamutuk nune’e husik hela buat di’ak ba nasaun,” Francisco Gusmão informa ba TATOLI liuhosi telefónema, Kuarta ne’e.
Francisco husu komunidade liuliu maluk joven espesialmente husi Baukau-oan atu kontinua aprende nune’e bele kontribui ba nasaun no ba inan-aman hotu atu kontinua partisipa iha prosesu dezenvolvimentu Timor-Leste.
Aleinde ne’e, nafatin fó onra no gloria ba eroi sira-ne’ebé fó-an ba liberta rai tanba liuhusi kontribuisaun durante luta ohin Timor-Leste selebra loron restaura independénsia ba da-XXIV.
“Bainhira líder sira kontinua fila kotuk ba malu sei fó impkatu ladi’ak ba jerasaun kontinuadora sira,” Francisco Gusmão akresenta.
Postu Administrativu Kelikai Antiga realiza Selebrasaun Loron Restaurasaun Independénsia ba da-XXIV iha Suku Namanei iha-ne’ebé aleinde isár bandeira hala’o mos atividade jogu tradisionál futu-manu no misa agradesimentu ho alokasaun orsamentu hamutuk $1.496.
Entretantu, Postu Administrativu Kelikai Antiga hamutuk suku haat kompostu husi Afasá, Namanei, Gurusá no Uaitame ho totál populasaun hamutuk 7.488, kompostu husi mane 3.710 no feto 3.778 ho total uma-kain hamutuk 2.713.
Jornalista: Natalino Belo
Editór: Xisto Freitas da Piedade
