DILI, 23 Maiu 2026 (TATOLI) – Eletrisidade Timor-Leste, Empreza Públika (EDTL, E.P) sei hamate ahi temporária kuaze iha Dili laran ba loron ohin (sábadu) tanba ekipa téknika sei instala liña transmisaun média (Medium Transmission Line) hahú husi tuku 12:00 to’o ramata.
Bazeia ba informasaun ne’ebé públika iha pájina ofisiál EDTL katak kompaña Star World Unipessoal Lda sei instala fiu iha área hirak ne’ebé sei sai afetadu ba ahi mate mak hanesan iha liña feeder IV Kaikoli, Liseu, Kolmera, Bairru Formoza, Palapasu, Mandarin, Bebora, Aitarak Laran, Kampung Alor, Hudi Laran, Fatuhada, Lurumata Komoro no Aimutin.
Enkuantu iha liña feeder V hanesan iha Bidau, Matadoru, Vera Cruz, Vila Verde, Bairru- Pité, Lavandaria, Perumnas, Surik Mas, Osindo, Manleuana, Delta I, II, III no IV mós sei hetan impaktu husi hamate eletrisidade temporária ne’e, tanba kompaña Star World Unipessoal Lda, mós sei hala’o instalasaun fiu iha área referida.
Nune’e ho avizu ne’ebé públika ona EDTL husu ba komunidade atu komprende no koolabora durante prosesu servisu iha terenu.
Enkuantu to’o notísia ne’e Públika Agência TATOLI seidauk hetan resposta husi dirijente EDTL nian, maske tenta ona konfirma.
Jornalista: Alexandra da Costa
Editór: Rafael Ximenes de A. Belo
