DILI, 25 Maiu 2026 (TATOLI)–Ekipa promovidu Segunda Divizaun AC Mamura preparadu no iha ambisaun atu halakon ekipa antigu Acádemica FC iha jogu dahuluk Liga Futeból Timor-Leste (LFTL) Segunda Divizaun ne’ebé sei realiza aban iha Estádiu Munisipál Dili.
“Ami prepara di’ak ona atu kompete iha jogu ne’e. Acádemika klube ne’ebé boot, maibé ami hakarak manán sira,” Treinadór AC Mamura, Inacio da Rosa Sam, hateten ba jornalista sira iha liuhusi konfer’ensia imprensa iha Estádiu Munisipál Dili, ohin.
Nia dehan, ho preparasaun ne’ebé maka’as no fó konfiansa hotu ba jogadór sira no Estádiu Munisipál Dili mak sei sai sasin.
“Ami-nia jogadór lokál hotu, tanba ami-nia objetivu hakarak promove jogadór timoroan,” Inacio dehan.
Iha fatin hanesan, Kapitaun ekipa, Helder Valente, hateten Mamura avansa ho prinsipiu ida, atu hasoru ekipa ne’ebé de’it prontu enfreta no enfreta atu hetan vitória.
“Ami mai ho prinsipiu ida, mai atu kompete no kompete atu hetan vitoria. Konfia iha ami-nia unidade entre jogadór no konfia iha materia ne’ebé mai hetan husi treinadór, minutu 90 mak termina,” Kapitaun ne’e afirma.
Acádemica FC
Iha sorin seluk, treinadór Acádemica FC, Lusinho dos Santos, hateten preparasaun foin semana ida ladun másimu maibé tanba oráriu jogu besik ona prontu atu kompete.
“Ami foin mak prepara semana ida liuba, maibé ami tenke kompete iha jogu aban ne’e. Ami-nia jogu dahuluk hasoru AC Mamura. Ida-ne’e todan uitoan maibé ami tenke hasoru,” treinadór ne’e hateten.
Dadaun ne’em Acádemica utiliza jogadór nasionál no internasionál hodi reforsa klube referidu.
“Ita iha jogadór lokál sira-ne’ebé antigu hela na’in-haat hanesan ne’e, sira balu mai foun, maibé ita mós iha jogadór internasionál na’in-haat sira-ne’e ida husi Gana, ida husi Japaun no na’in-rua husi Indonézia,” nia dehan.
Nia hatutan, Acádemica iha ambisaun maka’as hakarak fila-fali ba Primeira Divizaun tanba klube referidu degrada ba Segunda Divizaun iha tinan kotuk.
“Ida-ne’e mak ita-nia mehi, hakarak fila fali ba Primeira Divizaun. Ami haree ona oinsá hadi’a erru sira-ne’ebé antes ne’e iha,” nia tenik.
Iha fatin hanesan, Kapitaun ekipa, Leandro Vicent, hateten kombinasaun entre jogadór hotu di’ak tebes no preparadu atu hatudu jogu iha aban kontra adverasiu AC Mamura.
“Ami jogadór kombina malu di’ak tebes. Ita preparadu atu enfrenta jogu ida aban ne’e,” Kapitaun ne’e dehan.
Ho estratéjia ne’ebé treinadór haraik ona ba jogadór sira, hanesan kapitaun sei komunika di’ak ho jogadór seluk hodi hatudu jogu ho abilidade no kapasidade ne’ebé iha atu gaña vitoria save metin pontu tolu (3) iha jogu dahuluk ne’e.
Jornalista : Hortêncio Sanchez
Editór : Cancio Ximenes
