Kovalima,03 Juñu 2026 (TATOLI) – Servisu Munisípiu Agrikultura (SMA), Kovalima liuhusi estensionista sira durante udan iha fulan-Maiu ne’e, identifika natar ektare 58,25 mak hetan estragu.
“Durante udan iha fulan maiu nia laran tuir dadus ne’ebé mak ami hetan husi postu administrativu Zumalai suku Raimea área SP 1 no SP 2 hodi estraga mós natar na’in sira-nia haree ektare hamutuk 58,25″, Xefe Departamentu Programa Extensaun Agrikola Kovalima Filomeno Saldanha, informa dadus ne’e ba TATOLI,I.P iha Tabakolot.
Ho inundasaun ne’ebé mak akontese, nia dehan, difikulta tebes natar na’in sira tanba seidauk halo kolleta hare no foin atu tasak.
SMA Kovalima dadaun-ne’e foin mak halo levantamentu dadus relasiona dezastre refere ho tipu inundasaun hodi estraga natar na’in sira nia haree iha Maiu-ne’e. Ho problema ne’ebé mak agrikultór sira hasoru hanesan SMA Kovalima iha responsabilidade hodi submete ona karta ba Ministériu Agrikultura, Pekuária, Peska no Floresta (MAPPF).
“Ho dezastre ho tipu inundasaun mak nota katak iha tinan 2026 produsaun hare kulit sei la aumenta tanba iha epoka ne’e la konsege kolleta,” nia afirma.
Bazeia ba dadus postu administrativu Tilomar agrikultór sira la halai ona natar ektare 11, maibé daudaun ne’e seidauk hatene tanba seidauk simu dadus kultivasaun 2026 hanesan mós iha suku Suai Loro, Postu Administrativu Fatuema simu ona dadus iha 2025 hare kulit tonela 58 maibé daudaun ne’e tonelada 40-resin de’it.
Razaun kultivasaun haree kulit la sa’e tanba SMA Kovalima hasoru difikuldade mak hanesan joven-sira ba servisu iha estranjeiru, inan-aman sira simu pensaun idozu no pensaun veteranu, nune’e difisil atu aumenta produsaun hare kulit no batar.
Ho nune’e polítika SMA Kovalima kontinua partilla informasaun ba joven-sira no ferik-katuas sira bele halai natar, nune’e osan pensaun idozu no pensaun veteranu sira bele rai maibé mós depende ba pesoál sira.
Jornalista: Celestina Teles
Editor: Florencio Miranda Ximenes
