DILI, 04 Juñu 2026 (TATOLI)—Diretora Banku Dezenvolvimentu Aziátiku (ADB, sigla inglés), Stefania Dina, kinta ne’e, despede Primeiru-Ministru, Kay Rala Xanana Gusmão, hafoin ramata ninia misaun (servisu) durante tinan tolu (3) iha Timor-Leste.
“Ha’u hahú servisu iha fulan-Jullu tinan 2023, maibé agora ha’u-nia mandatu hotu ona tanba ne’e ha’u mai atu hato’o ha’u nia respeitu ba Primeiru-Ministru. Ha’u mos hakarak agradese ba nia lideransa no konfiansa ne’ebé nia fó ba ADB,” Diretora ADB, Stefania Dina, hateten ba jornalista sira iha Palásiu Governu.
Diretora ne’e garante katak ADB sei kontinua komprometidu tomak atu apoiu dezenvolvimentu sosiál no ekonómiku Timor-Leste nian.
“Ha’u sei asume kargu foun ida iha Manila (Filipina) ne’e mak hanesan Diretora ba Setór Agrikultura no Dezenvolvimentu Rurál ba Sudeste Aziátiku no Pasífiku, entaun ha’u sei kontinua envolve-an no apoiu ba Timor-Leste,” nia dehan.
Nia hatutan, iha enkontru ne’e aleinde selebra despedida maibé sira mós ko’alia kona-ba programa prioridade prinsipál sira liuliu iha setór ne’ebé nia sei lidera ba.
Tanba Primeiru-Ministru mós destaka importánsia ba ekonomia azúl, ne’ebé sai hanesan área ida-ne’ebé nia promove ho forte durante tempu naruk, nune’e sira halo kooperasaun di’ak liután atu aumenta apoiu ba setór ida-ne’e.
“Ami mós diskute kona-ba importánsia bee no seguransa bee nian. Ami ko’alia mós kona-ba avaliasaun bee ida-ne’ebé sei hahú iha koperasaun besik ho Gabinete Primeiru-Ministru no Ministériu Obra Públika,” nia informa.
Kestaun seluk sira aborda mós importánsia setór agrikultura nian ne’ebé bele kria oportunidade servisu ba povu, liuliu diskute kona-ba Timor nia kafé, ne’ebé konsidera hanesan kafé di’ak-liu iha mundu, entaun sira buka dalan atu kontinua apoiu setór agrikultura atu atrativu liután ba juventude sira hodi hetan servisu iha área ida-ne’e.
“Ami mós diskute kona-ba Banku Nasionál Dezenvolvimentu, no nia importánsia atu apoiu empreza ki’ik no média sira, hodi loke oportunidade barak liután ba dezenvolvimentu setór privadu iha nasaun ne’e. Nune’e, ha’u garante ba Primeiru-Ministru katak ADB sei kontinua fó apoiu ba área hirak ne’e no asegura katak sira sei sai prioridade aas iha ami-nia programa servisu sira iha futuru mai,” nia dehan.
Tanba ne’e, nia dehan, Primeiru-Ministru agradese mós ba ninia servisu no kompromisu durante iha Timor-Leste, ba servisu hamutuk ne’ebé sira hala’o durante ne’e.
Jornalista : Alexandra da Costa
Editór : Cancio Ximenes
