DILI, 23 Juñu 2026 (TATOLI) – Primeiru-Ministru, Xanana Gusmão, reafirma kompromisu Timor-Leste atu hametin Komunidade País Ko’alia Lian Portugés (CPLP), promove kooperasaun multilaterál no fortalese unidade entre Estadu-membru sira, durante vizita ofisiál bá sede CPLP iha Lisboa, segunda-feira (22/06).
Iha ninia intervensaun perante Reprezentante Permanente sira husi Estadu-membru CPLP no Sekretária Ezekutiva CPLP, Maria de Fátima Monteiro Jardim, nia oin, Primeiru-Ministru destaka katak vizita ne’e iha signifikadu espesiál, tanba koinside ho selebrasaun aniversáriu ba da-30 fundasaun CPLP nian.
“Selebrasaun ne’e sai oportunidade atu reafirma valór unidade iha diversidade no hametin lasu istóriku, kulturál no polítiku sira ne’ebé durante ne’e liga povu sira ne’ebéko’alia lia-portugés”, Xanana Gusmão hateten iha nota imprensa ne’ebé Tatoli asesu, ohin.
Primeiru-Ministru subliña katak situasaun internasionál atuál, ne’ebé marka ho inserteza no instabilidade, halo nesesáriu atu reforsa multilateralizmu, diálogu no kooperasaun entre nasaun sira hodi responde ba dezafiu globál sira.
Durante enkontru ne’e, partisipante sira diskute kestaun estratéjika sira ne’ebé relevante ba sidadaun CPLP nian, inklui mobilidade entre Estadu-membru sira, aprofundamentu integrasaun ekonómika no kooperasaun setoriál, no fortalese kolaborasaun iha área marítima no oseánika.
Primeiru-Ministru mós subliña importánsia atu aproxima CPLP ba rejiaun estratéjika sira seluk, partikularmente ASEAN, hodi alarga oportunidade ba kooperasaun no dezenvolvimentu entre povu sira.
Líder ne’e enkoraza CPLP, ne’ebé reprezenta populasaun millaun barak iha kontinente oioin, atu kontinua dezempeña papél relevante iha promosaun dignidade umana, pás, justisa no protesaun ambientál.
“Timor-Leste asume Prezidénsia Pro Tempore CPLP ho sentidu responsabilidade no fiar ba prinsípiu sira ne’e”, Xanana Gusmão subliña.
Iha remata reuniaun, Xefe Estadu reafirma prontidaun Timor-Leste atu serbisu hamutuk ho Estadu-membru no Observadór Asosiadu sira, no hato’o konvite ba membru CPLP hotu-hotu atu partisipa iha Reuniaun Konsellu Ministru CPLP nian ne’ebé sei realiza iha Dili iha fulan-Agostu 2026.
Vizita ne’e realiza iha kontestu Prezidénsia Pro Tempore CPLP ne’ebé Timor-Leste assume daudaun, no esforsu kontinuu atu hametin papél organizasaun ne’e iha promosaun kooperasaun, solidariedade no dezenvolvimentu sustentavel entre nasaun membru sira.
Nune’e mós, Sekretária Ezekutiva CPLP, Maria de Fátima Monteiro Jardim, elojia lideransa Timor-Leste iha ezersísiu Prezidénsia Pro Tempore CPLP no destaka kompromisu nasaun ne’e atu promove kooperasaun no unidade entre Estadu-membru sira.
Maria de Fátima Jardim haree katak Timor-Leste demonstra empeñu forte atu avansa prioridade sira CPLP nian, liuliu iha área mobilidade, kooperasaun ekonómika, dezenvolvimentu sustentavel no aproximasaun CPLP ho rejiaun estratéjika sira seluk.
Sekretária Ezekutiva CPLP reafirma apoiu Sekretariadu ba preparasaun Reuniaun Konsellu Ministrus CPLP ne’ebé sei realiza iha Dili no manifesta konfiansa katak Timor-Leste sei kontinua kontribui ba fortalesimentu papél CPLP iha sirkunstánsia internasionál atuál.
Iha vizita ne’e, Xanana Gusmão akompaña husi Ministru Justisa, Sérgio da Costa Hornai, Ministra Edukasaun, Dulce de Jesus Soares, Embaixadora Timor-Leste ba CPLP, Natália Carrascalão, Embaixadór Timor-Leste ba Portugál, Manuel de Araújo Serrano, Xefe Gabinete Primeiru-Ministru, Elizabeth Exposto no Inês Araújo Gonçalves.
Notísia relevante: Xanana no líder CPLP sira presta omenajen ba eis-Prezidente Repúblika Francisco Guterres Lú Olo iha Portugál
Jornalista: Arminda Fonseca
Editora: Maria Auxiliadora
